Toqaev pen BUU Bas hatshysynyń kómekshisi QR men BUU ózara is-qımylynyń ózekti máselelerin talqylady
ASTANA. QazAqparat - Senat Tóraǵasy Qasym-Jomart Toqaev pen BUU Bas hatshysynyń saıası máseleler jónindegi kómekshisi Mıroslav Enchanyń Qazaqstan Parlamentinde bolǵan kezdesýinde Qazaqstan men BUU-nyń ózara is-qımylynyń ózekti máseleleri talqylandy.
2 naýryzda Qazaqstannyń Birikken Ulttar Uıymyna kirgenine 25 jyl toldy. Q.Toqaev Qazaqstannyń táýelsiz memleket retinde qalyptasýy men damýyndaǵy jahandyq uıymnyń mańyzdy rólin atap ótti. Konstıtýtsııalyq reformalarǵa qatysty Tóraǵa jańa túzetýler Qazaqstan memleketiniń demokratııalyq, zaıyrly, quqyqtyq jáne áleýmettik negizderin bekitetini týraly pikirin bildirdi. Reforma bılik tarmaqtary arasyndaǵy ókilettikterdi qaıta bólýdi ǵana emes, táýelsizdiktiń myzǵymastyǵy men Qazaqstannyń Tuńǵysh Prezıdenti negizin qalaǵan basty qaǵıdalar jónindegi erejelerdi de qamtıdy, dedi joǵarǵy Palatanyń basshysy.
Tóraǵa Qazaqstandaǵy Adam quqyqtary jónindegi ýákildiń mártebesi men jaýapkershiligi kúsheıe túsetinine, ol laýazymǵa Prezıdenttiń usynýy boıynsha Senat saılaıtyny jáne jumystan bosatatynyna nazar aýdardy.
Kezdesý barysynda júzdesýshiler Qazaqstannyń BUU Qaýipsizdik Keńesine múshe bolǵan kezdegi Ortalyq Azııadaǵy jaǵdaı týraly pikir almasty. Senat Tóraǵasy aımaqtyq qaýipsizdik pen yntymaqtastyqty nyǵaıtý Prezıdent N.Nazarbaevtyń Qaýipsizdik Keńesine arnaǵan úndeýindegi negizgi basymdyqtardyń biri ekenin atap ótti. Q. Toqaev Qazaqstan BUU qurylymdarymen, onyń ishinde Ortalyq Azııaǵa arnalǵan preventıvtik dıplomatııa jónindegi aımaqtyq ortalyqpen tyǵyz jáne nátıjeli yntymaqtastyqqa senim artatynyn aıtty. Bul ortalyqtyń basshysy, Bas hatshynyń Arnaýly ókili Petko Draganov ta kezdesýge qatysty.
