Toqaev pen BAÁ delegatsııasy kólik-logıstıka salasyndaǵy yntymaqtastyqty damytýdy talqylady
ASTANA. KAZINFORM – Qasym-Jomart Toqaev BAÁ delegatsııasyn qabyldady, dep habarlaıdy Aqorda.
Memleket basshysy BAÁ Energetıka jáne ınfraqurylym mınıstri Sýheıl Ál-Mazrýı men Abý Dabı ámirligi Densaýlyq saqtaý departamentiniń tóraǵasy, G42 International kompanııasynyń bas dırektory Mansýr ál-Mansýrımen kezdesti.
Prezıdent berik dostyq baılanysqa, ózara senimge, strategııalyq seriktestikke negizdelgen Qazaqstan men Birikken Arab Ámirlikteri arasyndaǵy qarym-qatynas erekshe sıpatqa ıe ekenin atap ótti.
Sonymen qatar BAÁ Qazaqstannyń iri sheteldik ınvestorlarynyń ondyǵyna kiretinin aıtty. 2025 jyly elimizge Ámirlikterden 1,64 mıllıard dollar tikeleı ınvestıtsııa tartylyp, bul kórsetkish 3,5 ese ulǵaıǵan.
Qasym-Jomart Toqaev oraıly sátti paıdalana otyryp, BAE Prezıdenti sheıh Muhammed ben Zaıd Ál Nahaıanǵa, BAÁ Vıtse-Prezıdenti, Premer-mınıstri, Dýbaı Ámirshisi sheıh Muhammed ben Rashıd Ál Maktýmǵa, BAÁ Vıtse-prezıdenti sheıh Mansur ben Zaıd Ál Nahaıanǵa ystyq yqylasyn joldady.
Kezdesýde kólik-logıstıka salasyndaǵy yntymaqtastyqty damytýǵa basa mán berildi. Budan bólek, AD Ports Group kompanııasymen birlesken jobalardy iske asyrý, Kaspıı teńizinde portty ınfraqurylym men flotty damytý, sondaı-aq Orta dálizdi nyǵaıtý máseleleri talqylandy.
Sonymen qatar TransAýǵan dáliziniń perspektıvasy men teńiz, temirjol, avtokólik jáne áýe tasymaly baǵyttaryndaǵy uzaqmerzimdi seriktestikti qalyptastyrý jaıy qarastyryldy.
Jasandy ıntellekt pen tsıfrlandyrý salalaryndaǵy seriktestik te áńgime arqaýyna aınaldy.
Memleket basshysy Presight AI kompanııasymen sýperkompıýter ınfraqurylymy jobalaryn iske asyrý, Smart City jáne kólik qozǵalysy beınemonıtorınginiń ulttyq júıesin qurý boıynsha yqpaldastyqty joǵary baǵalady.
Qasym-Jomart Toqaev pen BAÁ delegatsııasy G42 kompanııasynyń Ekibastuzda «Derekterdi óńdeý ortalyqtarynyń alqaby» aýqymdy ekojúıesin qurýǵa qatysý múmkindigin qarastyrdy.
Memleket basshysy Qazaqstan men BAÁ qarym-qatynasyn damytýǵa qosqan úlesi úshin Sýheıl Ál-Mazrýıdi jáne Mansýr ál-Mansýrıdi ІІ dárejeli «Dostyq» ordenimen marapattady.
Aıta keteıik, Toqaev Sı Tszınpındi QHR-dyń 77 jyldyǵymen quttyqtady.
