Toqaev pen Álıev Transkaspıı talshyqty-optıkalyq baılanys jelisin iske qosý rásimine qatysty
ASTANA. KAZINFORM – Prezıdentter Kaspıı teńiziniń tabany arqyly Qazaqstan men Ázerbaıjandy jalǵastyratyn uzyndyǵy 380 shaqyrymdyq talshyqty-optıkalyq baılanys jelisin saltanatty túrde iske qosty, dep habarlaıdy Aqordanyń baspasóz qyzmeti.
Jobany «Qazaqtelekom» AQ men AzerTelecom kompanııasy birlesip júzege asyrdy.
Bul jeli Qazaqstandy jáne Ortalyq Azııanyń basqa elderin, sondaı-aq Qytaıdy Eýropamen jalǵaıtyn jańa baılanys baǵytynyń bir bóligi sanalady. Ol Jerorta teńizi men Qara teńizde ornalasqan baılanys júıelerine qosylýy múmkin.
Joba Qazaqstannyń tsıfrlyq ekonomıkasyn damytý turǵysynan strategııalyq mánge ıe. Atap aıtqanda, TOBJ elimizde qosymsha halyqaralyq baılanys jelisin iske qosyp, otandyq naryqqa jahandyq tehnologııalyq kompanııalardy tartýǵa jáne bultty servıster men jasandy ıntellekt ınfraqurylymyn damytýǵa jaǵdaı jasaıdy.
