Toqaev Parlament saılaýy jaıly: Jastarǵa shynaıy múmkindik týyp otyr

NUR-SULTAN. QazAqparat – Memleket basshysy Qasym-Jomart Toqaev el jastaryna senim bildirdi, dep habarlaıdy QazAqparat tilshisi.

«Biz qoǵamdyq pikirdi jáne azamattardyń túıtkildi máselelerin zerdeleı otyryp, mańyzdy isterge jol ashtyq. Búgin men jastarǵa arnalǵan 30 paıyzdyq kvota týraly aıttym. Bul bastamanyń zańdy turǵyda rásimdelýi – memleketti basqarý tásilderin jańartýǵa baǵyttalǵan baıypty qadam. Sondaı-aq, osy joba arqyly elimizdiń saıası ómirine belsendi aralasýǵa zor múmkindik beriledi», - dedi Prezıdent Ulttyq qoǵamdyq senim keńesiniń otyrysynda.

Qasym-Jomart Toqaev qazir elimiz boıynsha máslıhat depýtattary korpýsynda jastardyń úlesi 2 paıyz shamasynda ekenin jetkizdi.

«3 myńnan astam máslıhat depýtatynyń arasyndaǵy jastardyń sany bar-joǵy 60-qa jýyq. Mundaı jaǵdaıda qoǵamda, ásirese jastar arasynda áleýmettik lıfttiń tıimdiligi týraly suraqtyń týyndaýy oryndy. Al búgingi tańda barlyq saıası partııalar talantty ári belsendi jastardy tartyp jatqanyn kórip otyrmyz. Muny jaǵymdy úderis dep sanaımyn. Qanshama jastar úshin eldiń damýy men bolashaǵyn aıqyndaýǵa sózben emes, ispen úles qosýǵa shynaıy múmkindik týady. Muny aldaǵy Májilis pen máslıhattar saılaýynyń nátıjesinen kóretin bolamyz. Bul iske Ulttyq keńestiń barlyq múshesi zor eńbek sińirdi», - dedi ol.