Toqaev: Ótken jyly qazaqstandyq IT-qyzmetter eksporty 1 mıllıard dollardan asty
ASTANA. KAZINFORM – Memleket basshysy jasandy ıntellektige qatysty asqan jaýapkershilik tanytý qajet ekenin atap ótti, dep habarlaıdy Aqorda.
– Jaqynda Prezıdent Donald Tramptyń bastamasymen Amerıkanyń jetekshi tehnologııalyq kompanııalary Sýperıntellekt týraly kelisimge qol qoıǵanyn aıtqym keledi. Meniń oıymsha, múddeli elder osy tásildi úlgi retinde qarastyryp, muqııat zerdelegen soń jahandyq deńgeıde qoldanýǵa bolar edi, – dedi Qasym-Jomart Toqaev.
Prezıdent Qazaqstandy tsıfrlyq memleketke aınaldyrý úshin júıeli sharalar qabyldanyp jatqanyna nazar aýdaryp, elimizdiń jetistikterine toqtaldy.
– Ótken jyly qazaqstandyq IT-qyzmetter eksporty 1 mıllıard dollardan asty. Tsıfrlyq sheshimderimiz álemniń 100-den asa elinde qoljetimdi. Bul qadamdar men jetistikter elimizdegi jáne álemdegi progreske úles qosýǵa Qazaqstannyń da nıetti ekenin kórsetedi. Degenmen ozyq tehnologııa salasyndaǵy bul jetistiktermen shektelip qalýǵa bolmaıdy. Biz elimizdiń myqty tehnologııalyq negizin qalyptastyramyz desek, ınnovatsııalyq startap-kompanııalarǵa naqty qoldaý kórsetip, ozyq jobalardy júzege asyrýymyz kerek, – dedi Memleket basshysy.
Bul rette Prezıdent ónerkásip salasy boıynsha jasandy ıntellekt mindetteriniń tizimin jasaý mańyzdy dep sanaıdy. Atalǵan tizim naqty ekonomıkalyq qajettilikterge negizdelýge tıis.
Sondaı-aq Qasym-Jomart Toqaev osy tizimge súıene otyryp, Qazaqstan men shetelden kelgen komandalardyń qatysýymen AI Challenge uıymdastyrýdy usyndy. Oń nátıje kórsetken úzdik jobalar mindetti túrde óndiriske engiziledi.
Aıta keteıik, Qazaqstanda NVIDIA tehnologııasynyń bazasynda eki sýperkompıýter klasteri iske qosyldy.
