Toqaev: Otbasy — ulttyń biregeı bolmysyn aıqyndaıtyn mańyzdy ınstıtýt
ASTANA. KAZINFORM — Memleket basshysy Qasym-Jomart Toqaev qazaqstandyqtardy Otbasy kúnimen quttyqtady, dep habarlaıdy Aqordanyń baspasóz qyzmeti.
Qasym-Jomart Toqaev ár azamattyń dúnıetanymy, adamı qasıetteri qasterli qara shańyraǵynda qalyptasatynyn aıtty.
— Qymbatty otandastar! Otbasy kúni qutty bolsyn! Otbasy — ulttyń biregeı bolmysyn aıqyndaıtyn jáne memleket pen qoǵamnyń damýyna tikeleı yqpal etetin aıryqsha mańyzdy ınstıtýt. Ár azamattyń dúnıetanymy, adamı qasıetteri qasterli qara shańyraǵynda qalyptasady. Ana júreginiń jylýy men ákeniń óristi ónegesi ár adamdy bıik maqsattarǵa jeteleıdi. Úlkenderdiń danalyǵy men parasat-paıymy jastarǵa ómirlik baǵdar bolady, janashyr jandardyń qoldaýy árdaıym kúsh-qýat beredi. Osylaısha, biz salt-dástúrimiz ben tól qundylyqtarymyzdy urpaqtan urpaqqa jetkizip, halqymyzdyń mádenı dińgegin jáne rýhanı tutastyǵyn nyǵaıtyp kelemiz, — dedi ol.
Prezıdent 1 shilde kúni zańdy kúshine engen Qazaqstan Respýblıkasynyń Konstıtýtsııasyna sáıkes neke jáne otbasy, ana, áke men bala memlekettiń qorǵaýynda bolatynyn eske saldy.
— Konstıtýtsııada balalardyń quqyǵyn, áıel men ananyń otbasyndaǵy rólin kúsheıtýge basa nazar aýdaryldy. Tuńǵysh ret «neke — er men áıeldiń memleket zańǵa sáıkes tirkegen erikti jáne teń quqyqty odaǵy» degen norma kórinis tapty. Sondaı-aq bıyl Otbasy máseleleri jónindegi ýákil ınstıtýty quryldy. Bala tárbıesi máselesine zor jaýapkershilikpen qaraý, óskeleń urpaqtyń jan-jaqty damýy úshin qolaıly jaǵdaı jasaý — memlekettiń mańyzdy mıssııasynyń biri. Bul — adam kapıtalyn nyǵaıtýdyń, ıaǵnı elimizdiń áleýetin arttyrýdyń basty sharty. Otanǵa degen súıispenshilik sezimi, sondaı-aq zań men tártipke baǵynýdyń, tabıǵatty aıalaýdyń, qoǵamdyq oryndarda tazalyqty saqtaýdyń, jas býynnyń boıyna halqymyzdyń ozyq dástúrlerin sińirýdiń erekshe mán-mańyzy, eń aldymen, otbasyndaǵy tálim-tárbıe arqyly dáripteledi, — dedi Memleket basshysy.
Qasym-Jomart Toqaev ár shańyraǵy baqytty ómir súretin Ádiletti Qazaqstandy birge quratynymyzdy atap ótti.
— Bárimiz osy ortaq mindetke kúsh jumyldyrsaq, qoǵamda órkenıetti elderge tán jańa etıka qalyptastyramyz. Biz jasampaz ult retinde tarıhı órleý dáýirine senimmen qadam basyp, maqsat-mindetterimizge qol jetkizemiz. Osylaısha, ár shańyraǵy baqytty ómir súretin Ádiletti Qazaqstandy birge quramyz. Men buǵan kámil senemin. Barsha Qazaqstan azamatyna zor densaýlyq, tolaıym tabys tileımin! — dedi Prezıdent.
Aıta keteıik, Qazaqstanda 7-13 qyrkúıek aralyǵynda ótetin Otbasy kúnine arnalǵan aptalyq bastalǵany habarlandy.
Buǵan deıin AQSh Prezıdenti Donald Tramp Qasym-Jomart Toqaevqa Qazaqstan Táýelsizdiginiń 35 jyldyǵy qarsańynda quttyqtaý hatyn joldaǵanyn jazǵan edik.
