Toqaev: Ortalyq Azııa men Reseıdiń jańa ekonomıkalyq yntymaqtastyq modelin ázirleý kerek

ASTANA. QazAqparat – Ortalyq Azııa elderi men Reseı Federatsııasynyń ekonomıkalyq yntymaqtastyǵynyń jańa modelin ázirleý kerek. Bundaı usynysty Memleket basshysy Qasym-Jomart Toqaev «Ortalyq Azııa – Reseı» sammıtinde bildirdi, dep habarlaıdy QazAqparat tilshisi.

«Qazirgi jaǵdaıda qalyptasqan saýda-ekonomıkalyq baılanystardy saqtaý asa mańyzdy. Osy maqsatta Ortalyq Azııa elderi men Reseı Federatsııasynyń ekonomıkalyq yntymaqtastyǵynyń jańa modelin ázirleý men qabyldaý usynylady», - dedi Prezıdent.

Qazaqstan Prezıdenti shaǵyn jáne orta bıznesti qoldaý sharalaryna, energetıka, ónerkásip, kólik-logıstıka, aýyl sharýashylyǵy salalaryndaǵy birlesken jobalardy qolǵa alýǵa erekshe nazar aýdarý qajettigin aıtty.

«Bul rette saýda kedergilerin joıý jáne protektsıonıstik sharalarǵa jol bermeý mańyzdy. Bizge óńir ishindegi saýda-sattyqty damytýǵa baǵyttalǵan kúsh-jigerdi jandandyrý qajet. Bul jerde taýar aınalymynyń qurylymyn jaqsartýǵa jáne onyń nomenklatýrasyn keńeıtýge mán bergen jón», - dedi Qasym-Jomart Toqaev.

Aıta keteıik, elordada «Ortalyq Azııa-Reseı» sammıti bastaldy.

Joǵary deńgeıdegi kezdesýge Qazaqstan, Qyrǵyzstan, Ózbekstan, Tájikstan, Túrikmenstan jáne Reseı prezıdentteri qatysýda, olar altyjaqty formattaǵy yntymaqtastyqtyń keleshegin talqylap jatyr.

Buǵan deıin Memleket basshysy Ortalyq Azııanyń jekelegen elderindegi shekara máselesine pikir bildirgen edi.

Sonymen birge, Q. Toqaev Ortalyq Azııa elderi men halyqtarynyń negizgi múddelerine súıene otyryp, jańa qaýipterdiń aldyn alý jáne olarǵa ýaqtyly jaýap qatý úshin pármendi quraldardy ázirleý qajettigin aıtty.

Foto: t.me/bort_01