Toqaev Ortalyq Azııa elderine Ǵylym akademııalary arasynda tyǵyz baılanys ornatýdy usyndy
«Ortalyq Azııa halyqtarynyń tarıhı jáne mádenı mol murasyn nasıhattaýdy birlesken jumystyń mańyzdy baǵyty dep sanaımyn. Osy oraıda etnogeografııalyq jáne tarıhı zertteýlerdi uıymdastyrý, sondaı-aq ǵylymı eńbekterdi jarııalaý maqsatymen elderimizdiń Ǵylym akademııalary arasynda tyǵyz baılanys ornatý usynylady. Ulttyq arhıv ortalyqtary men kitaphanalardyń yntymaqtastyǵy negizinde arhıv jáne zertteý málimetterin almasý úshin Birikken onlaın-platforma qurýdy usynamyn. Bul ǵylym salasyndaǵy kooperatsııany tereńdetýge múmkindik beredi. Búkil aımaqqa zııan keltiretin aqparattyq keńistiktegi jaǵymsyz qubylystardyń aldyn alý úshin kúsh-jiger biriktirgen jón. Bul jumystardyń maqsaty – dostyǵymyzǵa syzat túsirmeý», - dedi Qazaqstan Prezıdenti Ortalyq Azııa memleketteri basshylarynyń IV Konsýltatıvtik kezdesýinde.
