Toqaev Ortalyq Azııa men Ázerbaıjan saýdasyn $20 mlrd-qa jetkizýdi usyndy
ASTANA. KAZINFORM — Prezıdent Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýine qatysty.
Qasym-Jomart Toqaev Ázerbaıjan men Ortalyq Azııa elderi Táýelsizdiginiń 35 jyldyǵymen tuspa-tus kelgen búgingi otyrystyń sımvoldyq máni erekshe ekenin atap ótti.
— Osy jyldar ishinde tutas dáýirdi qamtyǵan uzaq ári syndarly, sonymen qatar jemisti joldy eńserdik. Egemendigimizdi nyǵaıtyp, damýdyń tól modelin qalyptastyrdyq. Halyqaralyq qoǵamdastyqta laıyqty orynǵa ıe boldyq. Búginde Ortalyq Azııa men Ázerbaıjan Eýrazııadaǵy ósip-órkendep kele jatqan geosaıası yqpaldastyq ortalyǵy sanalady. Eń bastysy, baýyrlas halyqtarymyzdyń parasaty men yntymaq-birliginiń arqasynda beıbitshilik pen kelisim ornaǵan qoǵamda ómir súrip jatyrmyz. Aýyzbirshilik, ózara qoldaý men senim osy zamannyń syn-qaterlerine tótep berý úshin ortaq strategııalyq tiregimizge aınaldy. Bul úrdister geosaıası shıelenis pen jikke bóliný kúsheıip, halyqaralyq qatynastar qurylymy ózgeriske ushyraǵan tusta óte ózekti, — dedi Memleket basshysy.
Prezıdent Konsýltatıvtik kezdesýge qatysýshylarǵa óńirdegi yqpaldastyqtyń negizgi máseleleri boıynsha Qazaqstannyń ustanymyn jetkizdi.
— Birlesken kúsh-jigerdiń arqasynda saýda-ekonomıkalyq yntymaqtastyǵymyzdyń mazmuny jyl ótken saıyn tolyǵyp keledi. Birlesken kásiporyndar sany kóbeıdi, iskerlik baılanys nyǵaıa tústi. Ónerkásip, mashına jasaý, energetıka, aýyl sharýashylyǵy sekildi sektorlarda aýqymdy jobalar júzege asyrylýda. Saýda kedergileri birte-birte joıylyp, shekaralarda jańa ótkizý beketteri ashylyp jatyr. Avtokólik jáne temirjol baılanysy keńeıip keledi. Degenmen, bizdiń paıymdaýymyzsha, ishki naryq áleýeti áli de zor. Byltyr óńir ishindegi saýda kólemi shamamen 13 mıllıard dollardy qurady. Bul elderimizdiń jalpy taýar aınalymynyń 8 paıyzyna jýyq. Sondyqtan úkimetterimizge ózara saýda úlesin arttyryp, osy kórsetkishti keminde 20 mıllıard dollarǵa jetkizý úshin birlesken is-qımyl josparyn ázirleý jáne qabyldaý jóninde mindet júktegen durys, — dedi Qasym-Jomart Toqaev.
