Toqaev: «Ortalyq Azııa — Qytaı» formaty qaýipsizdik salasyndaǵy naqty sheshimderdiń úlgisi bolady
ASTANA. KAZINFORM — Memleket basshysy «Ortalyq Azııa – Qytaı» formatyndaǵy elderdiń ishki ister jáne qoǵamdyq qaýipsizdik mınıstrlerin qabyldaý barysynda osylaı aıtty, dep habarlaıdy Aqordanyń baspasóz qyzmeti.
Prezıdenttiń pikirinshe, qylmystyq elementterdiń óńirdegi ishki turaqtylyqty buzýyna jol berýge bolmaıdy. Bul oraıda júıeli ári batyl áreketter qajet.
— Qazaqstan zań ústemdigin qamtamasyz etýdi quqyq qorǵaý qyzmeti ǵana emes, memlekettik saıasattyń strategııalyq basym baǵyty retinde qarastyrady. Biz «Zań men tártip» tujyrymdamasyn dáıekti túrde nyǵaıtyp kelemiz. Atalǵan qaǵıdat jańa Konstıtýtsııamyzda elimizdi odan ári jańǵyrtýdyń basty alǵysharttarynyń biri retinde kórinis tapty. Mańyzdy mindetterdiń biri — uıymdasqan transulttyq qylmystyq toptardyń qarjy aǵynyna tosqaýyl qoıý. Ekstremızm ıdeıalarynyń taralýyn, lańkestik toptardyń adamdardy ınternet arqyly arbaýyn belsendi túrde áshkerelep, terrorlyq aktilerge astyrtyn ázirlik áreketterin aldyn ala anyqtaǵan jón. Aıtylǵan qaterlerdiń bári bir-birimen tyǵyz baılanysty. Oǵan tek jan-jaqty, keshendi túrde kúsh-jiger biriktire otyryp tótep bere alamyz. «Ortalyq Azııa — Qytaı» formaty elderimizdiń qaýipsizdigin qamtamasyz etý isinde ózara úılesimdi, naqty sheshimderdiń úlgisi bolatynyna senimdimin, — dedi Memleket basshysy.
Qasym-Jomart Toqaev qoǵamdyq jáne ekonomıkalyq tynys-tirshiliktiń onlaın keńistikke oıysýy kıberqaýipsizdik máselesin múldem jańa deńgeıge kóterdi dep sanaıdy.
— Aqparattyq tehnologııalar salasyndaǵy qylmys eshqandaı shekaraǵa baǵynbaıdy. Azamattarymyzǵa, bızneske jáne memlekettik organdarǵa zardabyn tıgizip otyr. Gıbrıdti jáne aqparattyq tehnologııalar jalǵan málimet, ıaǵnı, «feık» taratý quraly retinde qoldanylady. Óshpendilik órtin úrlep, alaýyzdyq týǵyzady. Destrýktıvti elementterdiń qolyndaǵy jasandy ıntellekt aýyr saldarǵa ákelip soǵatyn óte joıqyn aqparattyq qarýǵa aınaldy. Zań talaptaryna qaıshy kontent tolassyz kóbeıip jatyr. Osyǵan baılanysty qazirgi yqpaldastyq tetikterin júıeli túrde jetildirip, kıberqaýipsizdikke qarsy proaktıvti is-qımylǵa kóshý kerek, — dedi Prezıdent.
Budan buryn Memleket basshysy Ortalyq Azııa elderi men Qytaıdyń quqyq qorǵaý organdary arasyndaǵy yqpaldastyqty arttyrý óńirde turaqtylyqty jáne qaýipsizdikti saqtaýda mańyzdy ekenin atap ótti.
