Toqaev Ortalyq Azııa elderin «Bıootyn» jahandyq alıansymen baılanys ornatýǵa shaqyrdy

ASTANA. KAZINFORM — Memleket basshysy Qasym-Jomart Toqaev «Ortalyq Azııa — Italııa» birinshi sammıtinde aımaq elderin «Bıootyn» jahandyq alıansymen baılanys ornatýǵa shaqyrdy.

 — Deı turǵanmen qazir keleshek balamaly energetıka salasynda ekeni aıqyn kórinip otyr. Kómirteginiń úlesi tómen ekonomıkaǵa josparly túrde kóshý — Qazaqstan úshin basym baǵyttardyń biri. Biz ıtalııalyq seriktesterimizge elimizdiń birqatar óńirinde kún jáne jel elektr stansalaryn salý jónindegi jobalardy iske asyrǵany úshin razymyz, — dedi Prezıdent Qasym-Jomart Toqaev.

Prezıdent Italııa zamanaýı tehnologııalardyń ıesi retinde Ortalyq Azııa memleketteriniń ekonomıkasyn kómirteksizdendirýge atsalysyp otyrǵanyn atap ótti.

— Óńirdegi jasyl jobalardy qoldaý úshin jáne osy bir kómirteksiz otynnyń jetkizý tizbegin qurý úshin quryltaıshysy Italııa bolyp otyrǵan «Bıootyn» jahandyq alıansymen baılanysty jolǵa qoıý usynylady, — dedi Memleket basshysy.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr. 

Sondaı-aq, búgin túske deıin Memleket basshysy Qasym-Jomart Toqaev pen Italııa Mınıstrler Keńesiniń tóraǵasy Djordja Melonı Astana halyqaralyq forýmynyń ekinshi kúnindegi plenarlyq sessııaǵa qatysty. 

Budan keıin Qazaqstan Prezıdenti men Italııa Premer-mınıstri Aqordadaǵy kelissóz qorytyndysy boıynsha Strategııalyq seriktestikti keńeıtý jóninde Birlesken málimdeme qabyldaǵan bolatyn.