Qazaqstan Koreıamen birlesken logıstıkalyq kásiporyn qurýdy usyndy
ASTANA. KAZINFORM – Memleket basshysy ortaq kún tártibindegi kólik jáne logıstıka salasynyń ózektiligine nazar aýdardy. Onyń aıtýynsha, Azııa men Eýropa arasyn jalǵap jatqan Qazaqstan zamanaýı ári tıimdi kólik-logıstıka jelisin qalyptastyrý arqyly osy geografııalyq artyqshylyqtyń ıgiligin kórýdi kózdeıdi.
– Biz Transkaspıı halyqaralyq kólik baǵytynyń ótkizý qabiletin, jyldamdyǵy men senimdiligin arttyrý úshin temirjol, avtomobıl joldaryna, teńiz porttaryna, termınaldar men jalpy ınfraqurylymǵa qomaqty qarjy quıyp jatyrmyz. Orta dálizdiń damýyna Koreıanyń da úles qosar kezi keldi dep oılaımyn. Qazaqstan elimizde zamanaýı logıstıkalyq ortalyqtardy, mýltımodaldi termınaldar, qoıma keshenderi men jetkizý tizbegin basqarýǵa arnalǵan tsıfrlyq sheshimderdi damytyp jatqan CJ Logistics jáne LX Pantos sekildi koreıalyq logıstıka kompanııalardyń qadamyn quptaıdy. Atalǵan jumysty ilgeriletý úshin jańa logıstıkalyq jobalar men bastamalardy júzege asyrýǵa kómektesetin, sondaı-aq koreıalyq júkterdiń elimizdiń aýmaǵy arqyly kedergisiz tasymaldanýyn qamtamasyz etetin Qazaqstan-Koreıa birlesken kásipornyn qurýdy usynamyn. Qazaqstandyq Shin-Line kompanııasy men Lotte Global Logistics osy saladaǵy seriktestik josparyn iske asyra bastaǵany qýantady, – dedi Prezıdent.
Budan bólek, Qasym-Jomart Toqaev jasandy ıntellekt pen jańa tehnologııalar salasyndaǵy yntymaqtastyq áleýeti zor ekenin aıtty.
– Elimizdiń jasandy ıntellekt salasyndaǵy strategııasynda adam kapıtaly negizgi ról atqarady. Tehnologııalyq kóshbasshylyq, saıyp kelgende, adamdarǵa jáne olardyń ınnovatsııany ıgerý qabiletine baılanysty. Osy oraıda Seýl ulttyq ǵylym jáne tehnologııa ýnıversıtetimen birge Qazaqstanda alǵashqy Jasandy ıntellekt ınstıtýtyn qurý bastamasyn joǵary baǵalaımyz. Biz Eýrazııadaǵy eń iri derekter óńdeý ortalyqtarynyń ekojúıesin qalyptastyrýǵa kiristik. «Derekter óńdeý ortalyqtarynyń alqaby» energııa resýrstaryna baı Pavlodar oblysynda ornalasady. Joba bir gıgavatqa deıin qýatty qamtamasyz etedi. Keıin onyń aýqymyn taǵy da keńeıtýge bolady. Oǵan arnaıy jer telimi bólinedi jáne ulttyq sýperkompıýter qýatymen ushtastyrýǵa múmkindik bar. Maqsatymyz – Qazaqstandy Ortalyq Azııanyń basty esepteýish tehnologııalar habyna jáne Eýropa men Azııa arasyndaǵy altyn kópirge aınaldyrý. Bul jospar Koreıanyń tehnologııalyq kompanııalary úshin biregeı múmkindik beredi. Jasandy ıntellektiniń qosylǵan qun tizbegindegi barlyq kezeńinde paıdasyn kórgimiz keledi. Sondyqtan Qazaqstan mıkroelektronıka jáne jartylaı ótkizgishter óndirisine qajetti materıaldar men komponentterdiń senimdi jetkizýshisi bola alady. Osy rette Samsung Electronics jáne SK Hynix sekildi salanyń álemdik kóshbasshylarymen naqty yntymaqtastyq ornatýǵa múmkindik mol, – dedi Memleket basshysy.
Aıta ketelik Memleket basshysy Qazaq-koreı dóńgelek ústeliniń ashylýynda sóz sóılegen edi.
