Toqaev: Orta dálizge suranys artyp keledi
ASTANA. KAZINFORM – Bul týraly Prezıdent Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýinde aıtty. Bul týraly Aqordanyń baspasóz qyzmeti habarlady.
Memleket basshysy aımaqtaǵy elderdiń shekara mańynda qurylǵan saýda-logıstıka keshenderi men ónerkásip kooperatsııasy ortalyqtary mol múmkindikke jol ashatynyn atap ótti
– Qosylǵan qunnyń óńirlik tizbegin qurý úshin jaqyn arada olardy bir-birimen baılanystyrý qajet. Jalpy, elderimizde ınvestıtsııa, energetıka, óndiris salalary men basqa da strategııalyq baǵyttarda ózara yqpaldastyqqa jaǵdaı jasalǵan, – dedi Qazaqstan Prezıdenti.
Qasym-Jomart Toqaevtyń aıtýynsha, Qazaqstan kólik ınfraqurylymyn dáıekti túrde damytyp keledi. Bul óńirlik qarym-qatynas aıasyn keńeıtedi.
– Moıynty – Qyzyljar jáne Darbaza – Maqtaaral temirjol jelileriniń qurylysy aıaqtalýǵa taıaý. Kelesi jyly Baqty – Aıagóz baǵyty ashylady. Bul – óte mańyzdy, tipti strategııalyq sıpaty bar baǵdarlar. Qytaıdy Kaspıı teńizimen jáne Eýropa naryǵymen baılanystyratyn Aral – Kaspıı magıstraliniń qurylysy bastaldy. Qazaqstannyń kólik ınfraqurylymyn aýqymdy túrde jańǵyrtý tutas aımaqtyń tranzıttik rólin kúsheıte túsetinine senimdimin. Transkaspıı halyqaralyq kólik dálizin damytýǵa basa mán beriledi. Sońǵy jyldardyń dınamıkasy Orta dálizge suranystyń artyp kele jatqanyn kórsetedi. Reseımen yntymaqtastyq turǵysynan Soltústik – Ońtústik baǵyty da Qazaqstan úshin ózekti, – dedi Memleket basshysy.
Aıta ketelik Toqaev Ortalyq Azııa men Ázerbaıjan saýdasyn $20 mlrd-qa jetkizýdi usynǵan edi.
