Toqaev ornyqty keleshek qalyptastyrýda arqa súıerlik qaǵıdattardy atady
ASTANA. KAZINFORM – Óńirlik ekologııalyq sammıt aıasynda Ortalyq Azııadaǵy ekologııalyq yntymaqtastyq jónindegi Astana deklaratsııasy qabyldanady. Bul týraly Óńirlik ekologııalyq sammıtte Memleket basshysy Qasym-Jomart Toqaev aıtty.
- Tarazy basynda adamzattyń, eń aldymen, óskeleń urpaqtyń bolashaǵy tur. Bul – jaı ǵana ekologııalyq maqsat emes, kerisinshe, adamı paryz, ekonomıkalyq qajettilik, beıbitshilik pen turaqtylyqty saqtaý maqsatyndaǵy strategııalyq basymdyq, - dedi Memleket basshysy.
Osy oraıda Prezıdent ornyqty keleshek qalyptastyrýda mynadaı negizgi qaǵıdattarǵa arqa súıegen jón ekenin aıtty:
- halqymyz ben bolashaq urpaq aldyndaǵy jaýapkershilik;
- shekara men shekteýge bólinbeıtin yntymaqtastyq;
- resýrstarǵa, tehnologııalar men múmkindikterge teńdeı qol jetkizetin ádilettilik;
- nátıjesi kózge kórinetin naqty sharalar;
- aýqymy men damý deńgeıine qaramastan elder arasyndaǵy birlik.
- Sammıt barysynda Ortalyq Azııadaǵy ekologııalyq yntymaqtastyq jónindegi Astana deklaratsııasy jáne birqatar mańyzdy kelisim qabyldanady. Bul bizdiń atalǵan qaǵıdattardy berik ustanatynymyzdy jáne aımaqtyq ekologııalyq seriktestikti nyǵaıtýǵa qadam basqanymyzdy dáleldeıdi. Búgingi talqylaýlardyń mazmundy ári birlesken naqty bastamalarǵa negiz bolatynyna senimdimin. Osylaısha, halyqtarymyzdyń ıgiligine qyzmet etetin baıandy bolashaqtyń irgesin qalaımyz, - dedi Qasym-Jomart Toqaev.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótip jatyr.
