Toqaev: Orman-toǵaıdy kóbeıtý búkil eldi jumyldyratyn naǵyz halyqtyq ıdeıaǵa aınalýy kerek

ASTANA. KAZINFORM — Orman-toǵaıdy kóbeıtý búkil eldi jumyldyratyn naǵyz halyqtyq ıdeıaǵa aınalýy kerek. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalap jatqan Memleket basshysy Qasym-Jomart Toqaev aıtty. 

«Ekologııalyq ahýaldy jaqsartý – aldymyzda turǵan negizgi mindettiń biri. Biz qoǵamda qorshaǵan ortany qorǵaýdyń mán-mańyzyn keńinen dáripteýimiz kerek. Halyqty ekologııalyq faktorlardyń jaǵymsyz áserinen saqtaý qajet. Bıznes ókilderi tabıǵatty qorǵaý isine zor jaýapkershilikpen qaraýy kerek. Úkimet pen «Atameken» palatasy osy baǵytta naqty sharalar qabyldaýǵa tıis. Bul salaǵa ozyq tehnologııalardy keńinen engizý jumysyn jalǵastyrý qajet. Tabıǵatty lastaıtyn qaldyqtarǵa monıtorıng jasaıtyn ozyq júıe oıdaǵydaı jumys isteýge tıis», - dedi Qasym-Jomart Toqaev.

Prezıdenttiń atap ótýinshe, Qazaqstannyń biregeı janýarlar jáne ósimdikter álemin saqtaý máselesi árdaıym ózekti bolyp qala bermek.

«Memleket aldaǵy ýaqytta da keń baıtaq dalamyzdy jáne ormanymyzdy órtten qorǵaý úshin barlyq qajetti sharany qabyldaıdy. Qazaqstannyń tabıǵaty óte baı jáne alýan túrli. Alaıda orman-toǵaılar jerimizdiń 5 paıyzyn ǵana alyp jatyr. Tabıǵattyń ár alýandyǵyn saqtaý úshin biz orman alqaptaryn kóbeıtýimiz qajet. Bul mindet elimizdiń turaqty áleýmettik-ekonomıkalyq damýy úshin de óte mańyzdy.

Men Prezıdent bolyp saılanǵan kúnnen bastap osy máselege erekshe mán berip kelemin. Elimizdi kógaldandyrý jumysynyń qarqyny jaman emes. Toqtap qalmaı, ony jalǵastyrý qajet. «Semeı ormany» aıasynda orman tuqym baǵy bar. Bul – Ortalyq Azııadaǵy halyqaralyq ozyq talaptarǵa saı kóshet ósiretin birden-bir keshen. Osy jobany basqa da ormandy aımaqtarda júzege asyrǵan abzal. Orman-toǵaıdy kóbeıtý búkil eldi jumyldyratyn naǵyz halyqtyq ıdeıaǵa aınalýy kerek. Sondyqtan el ishinde aýqymdy aqparattyq-túsindirý jumystaryn júrgizgen jón», - dedi Memleket basshysy.