Toqaev óndiriste JI qoldanýdyń biryńǵaı mehanızmin qurýdy tapsyrdy
ASTANA. KAZINFORM — Prezıdent Jasandy ıntellektini damytý jónindegi keńestiń úshinshi otyrysynda óndiristegi JI jobalaryn damytýǵa artyq kedergiler bolmaýy kerek ekenin basa aıtty, dep habarlaıdy Aqordanyń baspasóz qyzmeti.
Qasym-Jomart Toqaev óndiristik Deep-Tech jobalardy ilgeriletý jáne myqty tehnologııalyq komandalar jasaqtaý óte mańyzdy dep sanaıdy. Onyń aıtýynsha, ındýstrııalyq mindetterdi oryndaıtyn mundaı komanda quramyna ǵylymı qaýymdastyq, tehnologııalyq kompanııalar men startaptar ekojúıesiniń ókilderi enýi qajet.
— Sonymen qatar AI Challenge mehanızmin qoldanǵan jón. Bul iske «tsıfrlyq kóshpeliler» men talantty jastardy tartýǵa bolady. Format ár tapsyrmanyń ereksheligine qaraı beıimdelýge tıis. ıAǵnı komandany ashyq irikteý men mindetterdi aıqyndaýdan bastap, izdenis nátıjelerin shynaıy óndiriste synaýǵa deıin ıkemdi bolǵany jón. Derekter, esepteý resýrstary jáne óndiris ınfraqurylymy komandalarǵa qoljetimdi bolýǵa tıis. Bul rette tapsyrys berýshi tysqary qalmaı, úderistiń ár kezeńine qatysýy qajet. Áıtse de JI jáne DeepTech sanatyndaǵy ónerkásip jobalaryna, ásirese, tehnologııalyq táýekelderi kóp, kommertsııalyq tıimdiligi dáleldenbegen bastapqy kezeńde ýaqyt pen resýrs kerek ekenin moıyndaǵan jón. Úkimet bastapqy táýekelderdi azaıtýǵa kómektesip, jeke kapıtaldy tartýǵa jaǵdaı jasaýy kerek. Keıinirek perspektıvti jobalar, negizinen, naryqtyq ortada damýǵa tıis, — dedi Memleket basshysy.
Prezıdenttiń pikirinshe, AI-Sana baǵdarlamasy óndiristegi naqty mindettermen tyǵyz baılanysty bolǵany jón. Daryndy jastar ekonomıkany jańǵyrtý isinde tájirıbe jınaqtaýy kerek.
Úkimetke jasandy ıntellektini ónerkásipte paıdalaný mindetterin sheshýdiń biryńǵaı mehanızmin qurý jóninde tapsyrma berildi. Onyń aıasynda laıyqty komandany tańdaýdan bastap, nátıjeni synaqtan ótkizý jáne ekonomıkalyq tıimdiligin baǵalaý kezeńderi túgel qamtylýǵa tıis.
Qasym-Jomart Toqaev tekserilgen sheshimderdi jappaı taratýdyń anyq ári ońtaıly tetikterin qurý qajettigine nazar aýdardy.
— Kóptegen perspektıvti sheshimder pılottyq joba satysynan sátti ótkenimen, qosymsha kelisýler, qaıtalama synaqtar, kúrdeli satyp alý úderisteri men zańnamalyq shekteýler saldarynan aıaqsyz qalady. Bul kásiporyndardyń paıda tabýyna jáne ázirleýshilerdiń naryqtyq múmkindikterine kedergi keltiredi. Tıimdi tásilderdi kommertsııalandyrýdyń aıqyn tetigi bolýy kerek. Ony óndiristik jaǵdaıy uqsas kásiporyndarda qaıta synaqtan ótkizýdiń qajeti joq. Utymdy otandyq sheshimderge de basa nazar aýdarǵan durys. Úkimetke tabysty pılottyq jobalardy tez arada kommertsııalandyrý jáne keńinen taratý joldaryn qarastyrýdy usynamyn. Ekonomıkalyq turǵydan paıdaly sheshimderdi iske asyrýda artyq kedergilerden arylǵan abzal, — dedi Memleket basshysy.
Buǵan deıin habarlanǵandaı, Memleket basshysy Jasandy ıntellektini damytý jónindegi keńestiń úshinshi otyrysyn ótkizdi.
