Toqaev NVIDIA negizin qalaýshy jáne prezıdenti Djensen Hýangty qabyldady

Aqordada ótken kezdesýde Prezıdent Qasym-Jomart Toqaev NVIDIA basshysy saparynyń ekijaqty yntymaqtastyqty nyǵaıtýdaǵy mańyzyn atap ótip, onyń otandyq jasandy ıntellekt ekojúıesin damytýǵa qosqan úlesine rızashylyq bildirdi.

— NVIDIA kompanııasymen yqpaldastyqqa sony serpin berý turǵysynan saparyńyzdyń máni zor. Seriktestigimizdi nyǵaıtý jolyndaǵy jáne Qazaqstannyń ıgiligi úshin atqaryp jatqan eńbegińizge alǵys aıtqym keledi, — dedi Memleket basshysy.

Qasym-Jomart Toqaev tsıfrlandyrý men jasandy ıntellektini damytýdy ulttyq basymdyq retinde atady, sondaı-aq bıyl elimizde Tsıfrlandyrý jáne jasandy ıntellekt jyly jarııalanǵanyn eske saldy.

Memleket basshysy NVIDIA men Higgsfield kompanııalary arasyndaǵy áriptestikti qýattaıdy. Onyń aıtýynsha, halqymyz atalǵan kompanııanyń otandyq tehnologııalyq jobalarǵa atsalysqanyn qup kóredi.