Toqaev Mıýnhende Alatau City megajobasyn tanystyrdy
ASTANA. KAZINFORM – Prezıdent Bavarııanyń iskerlik top ókilderiniń nazaryn Qazaqstannyń agroónerkásip keshenindegi mol áleýetke aýdardy, dep jazdy Aqorda.
Bavarııa aýyl sharýashylyǵyna arnalǵan mashına jasaý, ǵylymı negizdi egin sharýashylyǵy, sý únemdeıtin tehnologııalar jáne tamaq ónerkásibi salalarynda ozyq quzyretke ıe. Osy artyqshylyqtardy eskere otyryp, shaǵyn úlgili sharýashylyqtardy damytýǵa qatysty ortaq jobany iske qosý usynyldy. Bul bastama aıasynda Eýropa standarttaryna saı joǵary sapaly agroónimderdi óndirýge jáne óńdeýge basymdyq beriledi.
Budan bólek, Qasym-Jomart Toqaev Mıýnhende bızneske, ınvestıtsııa men ınnovatsııaǵa arnalǵan biregeı alań retinde Alatau City megajobasyn tanystyrdy.
Bavarııalyq kompanııalar Alataý qalasyn ınjenerlik jáne servıstik bólimshelerin ornalastyratyn, úzdik sheshimderdi kórsetetin, jergilikti seriktes izdep, ınvestıtsııalyq jobalardy iske asyratyn alań retinde qoldana alady.
Prezıdent paıymynsha, atalǵan bastamalardyń sátti bolýy, saıyp kelgende, bilikti kadrlarǵa baılanysty.
Sondyqtan Qasym-Jomart Toqaev elimiz Bavarııadaǵy kásiptik bilim berýdiń dýaldy júıesine qyzyǵýshylyq tanytatynyn málimdedi. Memleket basshysy Qazaqstanda bavarııalyq iri ónerkásip jobalaryn iske asyrý kezinde kásibı daıarlyq pen ınjenerlik quzyretti damytýdy eskergen jón dep sanaıdy.
Memleket basshysy sózin qoryta kele, Almaty qalasynda Bavarııa ekonomıkasynyń ókildigin ashýdy usyndy. Atalǵan mekeme Qazaqstanda ǵana emes, búkil Ortalyq Azııada nemis kásiporyndarynyń múddesi úshin jumys isteı alady.
Aıta keteıik, Bavarııa bıznesi Qazaqstanmen ózara tıimdi kooperatsııany damytýǵa qyzyǵýshylyq tanytty.
