Toqaev Mıanma Prezıdentiniń mindetin atqarýshy Mın Aýn Hlaınmen kelissóz júrgizdi
ASTANA. KAZINFORM – Memleket basshysy Qasym-Jomart Toqaev Mıanma Prezıdentiniń mindetin atqarýshy Mın Aýn Hlaınmen kelissóz júrgizdi. Bul týraly Aqordanyń baspasóz qyzmeti habarlady.
Mıanma ózindik mádenıeti, biregeı dástúri bar jáne geostrategııalyq turǵydan mańyzdy el. Qos memleket jahandyq kólik baǵyttarynyń toǵysqan tusynda ornalasqan.
Prezıdent meımanǵa Qazaqstannyń negizgi áleýmettik-ekonomıkalyq kórsetkishteri, sondaı-aq elimizdiń ornyqty damýyn qamtamasyz etý aıasyndaǵy strategııalyq mindetteri týraly málimet berdi.
Taraptar eki el ekonomıkasynyń erekshelikterin eskere otyryp, aýyl sharýashylyǵy, kólik-logıstıka, qarjy, ІT jáne tsıfrlandyrý sekildi mańyzdy salalarda ózara yqpaldastyq perspektıvasyna toqtaldy.
Prezıdenttiń aıtýynsha, Qazaqstan Eýrazııanyń basty tranzıt toraby retinde «Bir beldeý, bir jol» megajobasyn, Soltústik – Ońtústik jáne Orta dáliz kólik baǵyttaryn damytýǵa belsendi túrde atsalysyp jatyr.
Osyǵan oraı kezdesýde eki el arasyndaǵy kólik baılanysyn jolǵa qoıýdyń ózektiligine nazar aýdaryldy. Bul saýda-ekonomıkalyq baılanystardy keńeıtýge septigin tıgizedi.
Qasym-Jomart Toqaev Mın Aýn Hlaındy Qazaqstannyń ultaralyq jáne konfessııaaralyq saıasatymen tanystyrdy.
Atap aıtqanda, elimizde júzege asyrylyp jatqan «Birligimiz – áralýandyqta» qaǵıdaty, toleranttylyq ustanymy, sondaı-aq Astanada Álemdik jáne dástúrli dinder kóshbasshylarynyń Sezin ótkizý bastamasy jóninde baıandady.
Mın Aýn Hlaın Qasym-Jomart Toqaevqa qonaqjaılyq tanytqany úshin alǵys aıtyp, ózara múddege saı baǵyttar boıynsha konstrýktıvti yntymaqtastyq ornatýǵa jáne birlese jumys isteýge daıyn ekenin rastady.
Eske sala keteıik, buǵan deıin Ońtústik-Shyǵys Azııadaǵy jańa seriktes: Mıanma jaıly 5 suraq týraly jazǵan edik.