Toqaev mońǵol ánshisiniń Silk Way Star konkýrsynda kórermenniń yqylasyna bólengenin aıtty
ASTANA. KAZINFORM – Bıyl Mońǵolııada Study in Kazakhstan bilim jármeńkesi ótkiziledi. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
- Kelissóz barysynda mádenı-gýmanıtarlyq baılanysqa da mán berdik. Byltyr Astanada ótken Silk Way Star halyqaralyq vokaldyq konkýrsynda mońǵolııa ánshisi Mıshel birinshi oryn alyp, kórermenniń ystyq yqylasyna bólendi. Mundaı jobalar halyqtarymyzdyń ǵasyrlar boıy qalyptasqan rýhanı baılanysyn bekemdeıtini sózsiz, - dedi Memleket basshysy.
Sondaı-aq Prezıdent elderimizdiń bilim, ǵylym salasyndaǵy yntymaqtastyǵyn nyǵaıtýǵa mol múmkindik bar ekenin aıtty.
- Qazaqstan mońǵol azamattaryna bilim granttaryn bólip keledi. Biz grant sanyn kóbeıtip, Mońǵolııaǵa qajetti mamandardy daıyndaý isine atsalysýǵa ázirmiz. Bıyl Mońǵolııada Study in Kazakhstan bilim jármeńkesin ótkizý josparlanyp otyr. Sonymen qatar biz Ulan-Batyr qalasynda Qazaqstannyń irgeli ýnıversıtetiniń fılıalyn ashýdy usyndyq. Buǵan qosa eki eldiń arasyndaǵy baýyrlastyq qarym-qatynasty odan ary damytýǵa kelistik. Bul sharalar elderimizdiń dostyǵyn bekemdeýge, saýda-ekonomıkalyq jáne mádenı-gýmanıtarlyq baılanysty kúsheıtýge jol ashady. Osy jumysty jalǵastyra berý mańyzdy dep sanaımyn, - dedi Qasym-Jomart Toqaev.
Aıta keteıik, ótken jyldyń qarashasynda «Silk Way Star» halyqaralyq jobasynyń grand-fınaly máresine jetip, jobanyń jeńimpazy Mıshel Djozef (Mońǵolııa) bolǵan edi.
