Toqaev Mindetti áleýmettik medıtsınalyq saqtandyrý qoryn Qarjy mınıstrligine berýdi qoldady
QYZYLORDA. KAZINFORM – Úkimettiń Mindetti áleýmettik medıtsınalyq saqtandyrý qoryn Qarjy mınıstrliginiń qaramaǵyna berý sheshimi durys. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.
- Medıtsınalyq áleýmettik saqtandyrý qoryna júrgizilgen keshendi tekserý kóptegen zań buzýshylyq pen teris paıdalanýdy anyqtady. Negizinen, bul — qarabaıyr qosyp jazý derekteri men memlekettik qarajatty asa iri kólemde jymqyrý maqsatynda qujattardy qoldan jasaýdyń óreskel faktileri. Ekonomıkanyń sapaly ósýin qamtamasyz etýge, ınfraqurylymdyq jobalardy iske asyrýǵa jáne densaýlyq saqtaý salasyn damytýǵa búkil el kúsh-jigeri men qarjysyn jumyldyryp otyrǵan shaqta, áleýmettik salaǵa bólingen qomaqty qarajattyń ashyqtan-ashyq talan-tarajǵa salynýy jol berýge bolmaıtyn jaǵdaı, - dedi Memleket basshysy.
Prezıdenttiń dereginshe, 2024–2025 jyldary tek densaýlyq saqtaý salasyn damytýǵa memleket 7,8 trln teńge bóldi.
- Quqyq qorǵaý organdaryna sybaılas jemqorlyq shemalarynan paıda tapqan barlyq tulǵany anyqtaý tapsyryldy. Úkimettiń Mindetti áleýmettik medıtsınalyq saqtandyrý qoryn Qarjy mınıstrliginiń qaramaǵyna berý sheshimin qoldaımyn. Qorda oryn alǵan jaǵdaı — bul áleýmettik sala basshylarynyń kásibıliginiń joqtyǵy men memlekettik múddege nemquraıly qaraýynyń saldary, - dedi Qasym-Jomart Toqaev.
Aıta keteıik, 2026 jyldan bastap taǵy 1 mıllıonǵa jýyq azamat MÁMS-pen qamtylady.