Toqaev memorgandarda avtoparkke qomaqty qarjy jumsalatynyn synady

NUR-SULTAN. QazAqparat – Memleket basshysy Qasym-Jomart Toqaev memlekettik organdarda avtoparkke qomaqty qarjy jumsalyp jatqanyn synǵa aldy, dep habarlaıdy QazAqparat tilshisi.

«Bıýjettiń eleýli qarajaty ortalyq memlekettik organdardyń basshylyǵy úshin avtoparkti kútip ustaýǵa jumsalady. Máselen, bir avtokólike jylyna 6 mıllıon teńgeden astam (tehnıkalyq qyzmet kórsetý men basqa da shyǵyndar) jumsalady», - dedi Prezıdent Úkimettiń keńeıtilgen otyrysynda.

Osy oraıda Memleket basshysy birqatar elde jeke qyzmettik kóliktiń ornyna aqshalaı ótemaqy tájirıbesi engizilgenin aıtty.

«Bul tájirıbe birqatar mekemede paıdalanylyp keledi. Osyndaı qadam «Samuryq-Qazyna» qorynda da aprobatsııadan sátti ótti. Bul óz kezeginde qyzmettik kólikter sanyn aıtarlyqtaı qysqartýǵa, ákimshilik shyǵystardy 1,5 mlrd teńgege azaıtýǵa múmkindik berdi», - dedi Memleket basshysy.

Osy oraıda Q. Toqaev Úkimetke Prezıdenttiń is basqarmasymen birlese memlekettik organdardyń basshylaryn qyzmettik avtokólikpen jańa úlgi boıynsha qamtamasyz etýge qatysty usynys engizýdi tapsyrdy. Bul turǵyda eleýli túrde qysqartý qajettigi bar.