Toqaev: Memlekettiń tabandy jumysy arqyly elordaǵa gaz qubyry tartyldy
ASTANA. KAZINFORM — Respýblıka aýmaǵyndaǵy gazben qamtý kórsetkishi 60 paıyzdan asty. Bul týraly Prezıdent Astanany damytý jónindegi keńeste aıtty.
Memleket basshysy elordanyń tynys-tirshiligin qamtamasyz etý isinde energetıkalyq ınfraqurylym asa ózekti másele ekenin atap ótti.
— Jańa qosalqy stantsııalardy salýdy jedeldetken durys. Munda qandaı da bir kedergilerge jol bermeý kerek. Úkimetke qajetti qarjyny bólýdi tapsyramyn. Turǵyn úı-kommýnaldyq sharýashylyq júıeleri men energetıkalyq ınfraqurylymnyń úzdiksiz jumys isteýi — kez kelgen qalanyń tynys-tirshiligin qamtamasyz etýdiń basty sharty. Olaı bolmasa qalǵan sharýadan qaıran joq. Memlekettiń tabandy jumysy arqyly elordaǵa gaz qubyry tartyldy. Al respýblıka aýmaǵyndaǵy gazben qamtý kórsetkishi 60 paıyzdan asty. Ekonomıkanyń qajettiligi artyp kele jatqanyn eskersek, qazir óndiriletin 29 mıllıard tekshe metr taýarly gaz ishki suranysty tolyq óteı almaıdy. Sondyqtan gaz óńdeý boıynsha josparlanǵan barlyq jobany ýaqtyly iske qosý óte mańyzdy. Bul jumys ornyqty ári kepildi resýrstyq baza qalyptastyrýmen qatar júrgizilýi kerek, — dedi Prezıdent.
Budan buryn Qasym-Jomart Toqaev elorda jol-kólik oqıǵalarynyń kóbeıgenine alańdaýshylyq bildirdi.
Sondaı-aq, Memleket basshysy qaladaǵy kólik ınfraqurylymyna nazar aýdarý kerektigin aıtty.