Ulttyq qaýipsizdik komıtetine JI mınıstrliginiń keıbir ókilettikteri berildi

ASTANA. KAZINFORM – 2025 jylǵy 25 jeltoqsan kúni Memleket basshysy Qasym-Jomart Toqaev memlekettik basqarý júıesin odan ári jetildirý jónindegi sharalar týraly jarlyqqa qol qoıdy. Bul týraly Aqordanyń baspasóz qyzmeti habarlady. 

Qazaqstan Respýblıkasy Konstıtýtsııasynyń 44-babynyń 21) tarmaqshasyna sáıkes memlekettik basqarý júıesiniń tıimdiligin arttyrý maqsatynda QAÝLY ETEMІN:

1. Qazaqstan Respýblıkasynyń Ulttyq qaýipsizdik komıtetine Qazaqstan Respýblıkasy Jasandy ıntellekt jáne tsıfrlyq damý mınıstrliginiń aqparattyq-kommýnıkatsııalyq ınfraqurylymnyń asa mańyzdy obektileriniń aqparattyq qaýipsizdigi bóliginde aqparattandyrý salasyndaǵy memlekettik baqylaýdy júzege asyrý jónindegi fýnktsııalary men ókilettikteri berilsin.

2. Qazaqstan Respýblıkasynyń Ulttyq qaýipsizdik komıteti beriletin fýnktsııalar men ókilettikterge sáıkes Qazaqstan Respýblıkasy Jasandy ıntellekt jáne tsıfrlyq damý mınıstrliginiń quqyqtary men mindettemeleriniń quqyqtyq mırasqory bolyp aıqyndalsyn.

3. Qazaqstan Respýblıkasynyń Úkimeti Qazaqstan Respýblıkasynyń Ulttyq qaýipsizdik komıtetimen birlesip, Qazaqstan Respýblıkasynyń zańnamasynda belgilengen tártippen:

1) qajetti zańnamalyq túzetýler ázirleýdi;

2) osy jarlyqty iske asyrý boıynsha ózge de sharalardyń qabyldanýyn qamtamasyz etsin.

4. Qazaqstan Respýblıkasynyń Ulttyq qaýipsizdik komıteti «Qazaqstan Respýblıkasynyń Ulttyq qaýipsizdik komıteti týraly erejege ózgerister men tolyqtyrýlar engizý týraly» Qazaqstan Respýblıkasynyń Prezıdenti jarlyǵynyń jobasyn Qazaqstan Respýblıkasy Prezıdentiniń qaraýyna engizsin.

5. Osy jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

6. Osy jarlyq qol qoıylǵan kúninen bastap qoldanysqa engiziledi. 

Aıta ketelik keshe Prezıdent Baýyrjan Momyshulyna «Halyq qaharmany» ataǵyn berý týraly jarlyqqa qol qoıǵan edi.