Toqaev: Memlekettik qyzmetshilerdiń boıynda «tsıfrlyq mentalıtetti» damytý mańyzdy
«Búginde tsıfrlyq tehnologııalar jahandyq ekonomıkalyq damýdyń negizgi faktorlarynyń birine aınalyp otyr. Tsıfrlandyrý el ekonomıkasynyń bolmysyn túbegeıli ózgertip, eńbek ónimdiliginiń artýy men ómir sapasynyń jaqsarýyna zor yqpalyn tıgizýde. Memleket basshysy aıqyndap bergendeı, tsıfrlandyrýdy keńinen qoldanysqa engizý - elimizdi jańǵyrtýdyń basty baǵyty. Bul týraly Elbasy búgingi «Nur Otan» partııasynyń keńeıtilgen otyrysynda da taǵy da atap ótti», - dep toqtaldy Senat tóraǵasy parlamenttik tyńdaý barysynda.
Halyqaralyq sarapshylardyń baǵalaýynsha, 2025 jylǵa qaraı tsıfrlandyrý arqyly ishki jalpy ónimniń 19 paıyzdan 34 paıyzǵa deıin ósýi kútilýde. Boljam boıynsha 2020 jylǵa qaraı tsıfrlandyrý álem ekonomıkasynyń tórtten birin quraıtyn bolady.
Bul turǵyda ol tsıfrlyq tehnologııalar zaman talaby ekenin, olar qoǵam ómirine áserin molynan tıgizip jatqanyn atap ótti.
«Sonyń nátıjesinde densaýlyq saqtaý men bilim berý, qala tirshiligi, jalpy adamnyń kúndelikti ómiri aıtarlyqtaı ózgerip, jańa sıpatqa ıe bolýda. Soǵan qaraı kommýnıkatsııalar men aqparattyq júıelerge jáne kórsetiletin qyzmetterge jańa talaptar qoıylýda. Serpindi damyp kele jatqan aldyńǵy qatarly memleketter tsıfrlyq ekonomıkany damytýǵa belsendi túrde basymdyq berýde. Bul - jahandyq kún tártibiniń asa mańyzdy baǵyty. Tsıfrlyq ekonomıkany qalyptastyrýda aıtarlyqtaı nátıjelerge qol jetkizgen elderge tán ortaq sıpat bar. Ol - ınnovatsııany engizýge qolaıly jaǵdaı týǵyzyp, tsıfrlyq tehnologııalar men ınfraqurylymǵa qomaqty ınvestıtsııa salý», - dedi Toqaev.
Senat tóraǵasy zertteýlerge súıene otyryp, aldaǵy 10-20 jylda qazirgi kásipterdiń jartysyna jýyǵy qajetsiz bolatynyn jetkizdi. Osy oraıda elimizge ekonomıkanyń perspektıvaly qajettilikterine sáıkes, otandyq bilimdi jańǵyrtý kerek.
«Halyq arasynda, birinshi kezekte memlekettik qyzmetshilerdiń boıynda «tsıfrlyq dildi» damytý óte mańyzdy. Olar jańa tsıfrlyq shynaıylyqta tıimdi jumys isteı bilýi tıis. Bul rette halqymyzdy tsıfrlyq ekonomıkaǵa jappaı tartýǵa tıistimiz», - dedi Qasym-Jomart Toqaev.