Toqaev: Memleket-jekemenshik seriktestigi jekelegen jobalardy astyrtyn qarjylandyryp otyr

ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda memleket-jekemenshik seriktestiginiń olqy tustaryn synady.

«Memleket pen jekemenshiktiń seriktestigin damytý úshin biraz sharýa atqaryldy. Biraq nátıjesi áli de mardymsyz. Qazir mundaı jobalar negizinen áleýmettik salaǵa engizilip jatyr. Bul saladan kóp tabys túspeıtini belgili. Ashyǵyn aıtqanda, biz nysandardyń qurylysyna bólip tóleý arqyly qarjy quıyp otyrmyz. Memleket úshin mundaı tásil, árıne, tıimsiz. Jalpy, osy saladaǵy normalar men rásimder jeke bızneske salmaq salady ne bolmasa ınvestorǵa óte tıimdi bolǵanymen, memleketke paıda ákelmeıdi. Bir sózben aıtqanda, teńgerimdi, ıaǵnı balansty saqtaý kerek, memleket pen ınvestordyń múddesi birdeı eskerilýi qajet», - dedi Memleket basshysy.

Prezıdenttiń aıtýynsha, memleket pen jekemenshik seriktestigi júıesin qaıta qurý jumystary baıaý júrip jatyr

«Biraq bizde memleket pen jekemenshik seriktestigi jeke jobalardy bıýdjetten astyrtyn qarjylandyratyn tásilge aınalyp ketti. Memleket pen jekemenshik seriktestigi júıesin qaıta qurýǵa qatysty jumys baıaý júrip jatyr. Ázirge naqty nátıje joq. Úkimet osy máseleni retke keltirý qajet. Eshqandaı jańalyq oılap tabýdyń qajeti joq. Oǵan álemdegi ozyq tájirıbeni paıdalanyp, ýaqyt tezinen ótken tásilderdi usyna alatyn halyqaralyq uıymdardy tartqan jón. Bul máseleni shuǵyl sheshý kerek», - dedi Qasym-Jomart Toqaev.

Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.