Toqaev: Memleket qazynasyna aýyz salý — elge jasalǵan eń aýyr qastandyq
ASTANA. KAZINFORM — Memleket qazynasyna aýyz salý, Konstıtýtsııanyń talaptaryn aıaqqa taptaý — elge jasalǵan eń aýyr qastandyq. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.
— Kóp uzamaı halqymyz el Táýelsizdiginiń 35 jyldyǵyn atap ótedi. Bul — memleketimizdiń tarıhı ósip-órkendeý jolyndaǵy asa mańyzdy beles. Osy kezeńde biz talaı qıly joldan aman-esen óttik. Berekeli birligimizdiń arqasynda kóptegen synaqty abyroımen eńserdik. Memlekettiligimizdi nyǵaıttyq, halyqaralyq abyroı-bedelimizdi kúsheıttik. Biz Qazaqstandy básekege qabiletti, ozyq el retinde damytý úshin áli de belsendi ári tabandy jumys isteı beremiz. Árıne, osy kezge deıin bárimiz jurt bolyp jumylyp, biraz sharýa atqardyq. Óskeleń urpaq aldyndaǵy jaýapkershilikti tereń sezine otyryp, aýqymdy reformalardy júzege asyrdyq, — dedi Memleket basshysy.
Prezıdent naýryz aıynda ótken jalpyulttyq referendýmda memleketimizdiń tól qujaty — Konstıtýtsııamyz qabyldanǵanyn atap ótti.
— Buny ultymyzdyń taǵdyryna tikeleı áser etetin tarıhı sheshim boldy desek, artyq bolmas. Konstıtýtsııada egemendik pen táýelsizdikti qorǵaý, jalpyulttyq birligimizdi kúsheıtý memlekettiligimizdiń negizgi qaǵıdattary bolyp bekitildi. Adam kapıtalyn, bilim-ǵylymdy, ınnovatsııany damytý konstıtýtsııalyq mártebege ıe bolǵan mindetke aınaldy. Biz ult Konstıtýtsııasynda «Zań men tártip» qaǵıdatyn halqymyzdyń asa mańyzdy qundylyǵy dep aıqyndadyq, — dedi Qasym-Jomart Toqaev.
Memleket basshysy «Zań men tártip» Ádiletti Qazaqstandy qurý jolyndaǵy basty ustanymy ekenin basa aıtty.
— Túptep kelgende, aýqymdy saıası jáne áleýmettik-ekonomıkalyq ózgerister dál osy qaǵıdatqa negizdeledi. Óıtkeni zań ústemdik etpese, qoǵamda tártip bolmasa, eshqandaı reformanyń nátıje bermesi aıdan anyq. Memleket qazynasyna aýyz salý, Konstıtýtsııanyń talaptaryn aıaqqa taptaý — elge jasalǵan eń aýyr qastandyq. Sondyqtan biz qoǵamdyq derttiń bárine, sonyń ishinde sybaılas jemqorlyqqa qarsy batyl kúres júrgizemiz, — dedi Prezıdent.