Toqaev medqyzmetkerlerdiń mártebesin arttyrý ózekti máselege aınalǵanyn aıtty
NUR-SULTAN. QazAqparat – Koronavırýs indeti medıtsına ǵylymyn damytýdyń da ózekti ekenin kórsetip berdi. Bul týraly Memleket basshysy Qasym-Jomart Toqaev Bul týraly QR Prezıdenti Qasym-Jomart Toqaev «Egemen Qazaqstan» gazetine bergen suhbatynda aıtty, dep habarlaıdy QazAqparat.
«Barsha jurtqa qaýip tóndirgen indetti aýyzdyqtaý úshin, eń aldymen, dárigerler men medıtsına qyzmetkerleri jumyldyryldy. Olarǵa jan-jaqty qoldaý kórsetýdiń mańyzy zor. Bılik tarapynan barynsha jaǵdaı jasalýda.Ókinishke qaraı indetpen kúres barysynda medıtsına júıesiniń osal jaqtary da anyqtaldy. Saqtyq sharalaryna qaramastan, kóptegen medıtsına qyzmetkeri vırýs juqtyryp aldy. Dárigerlerimiz onsyz da jetpeı jatqanda, osyndaı qıyndyqqa tap boldyq. Bul jaǵdaı tikeleı baqylaýymda. Naqty tapsyrmalar berildi. Іndetpen kúresýge atsalysqan dárigerlerge tıisti ústemeaqy tólenýde» - dedi Prezıdent.
Sonymen qatar, Memleket basshysy qazirgi ýaqytta medıtsına qyzmetkerleriniń mártebesin arttyrý ózekti máselege aınalǵandyǵyn aıtty.
«Dárigerlerge beriletin áleýmettik kepildik aıasyn keńeıtip, yntalandyrý júıesin jetildirý qajet. Pandemııa densaýlyq saqshylaryna qoldaý kórsetýdiń asa mańyzdy ekenin ańǵartty. Biz táýelsizdik alǵaly beri bul salaǵa mán berip kelemiz. Degenmen áli de atqaratyn jumystar az emes.
Koronavırýs indeti medıtsına ǵylymyn damytýdyń da ózekti ekenin kórsetip berdi. Qazir búkil álem osy salaǵa erekshe nazar aýdaryp, juqpaly aýrýlarmen kúresti kúsheıtýde. Bul – zańdy qubylys. Aldaǵy ýaqytta elimizde medıtsınalyq-bıologııalyq zertteýlerge erekshe kóńil bólinedi. Óıtkeni aıbyndy áskermen birge myqty medıtsına da – memlekettiń negizgi qalqany. Budan bylaı onyń ózektiligi arta túsetini sózsiz.
Jaqynda Nur-Sultan qalasynda modýldik juqpaly aýrýlar aýrýhanasy ashyldy. Onyń nebári eki apta ishinde salynǵanyn bilesizder. Aýrýhana halyqaralyq talaptarǵa saı jabdyqtalǵan. Ony arnaıy baryp aralap kórdim. Sonymen qatar ǵalymdarymyz dıagnostıkalyq test júıesin ázirlep shyqty. Mine, osyndaı naqty jumystar salany jetildire túsetini sózsiz. Densaýlyq saqtaý mınıstrligi aldaǵy ýaqytta da medıtsınalyq qyzmet sapasyn arttyrý úshin aýqymdy ári júıeli jumys júrgizýi kerek», - dep atap aıtty Toqaev.
