Toqaev medıtsınalyq maqsattaǵy buıymdar shyǵaratyn kásiporyndar kórmesin tamashalady
ASTANA. KAZINFORM – Memleket basshysy Qasym-Jomart Toqaev medıtsınalyq maqsattaǵy buıymdar shyǵaratyn elordalyq kásiporyndar kórmesin aralady. Bul týraly Aqordanyń baspasóz qyzmeti habarlady.
Memleket basshysyna Heart Center Foundation qoǵamdyq qorynyń ókilderi Qazaqstandaǵy kardıohırýrgııa men transplantologııany damytý mıssııasy týraly áńgimeledi.
Qasym-Jomart Toqaevqa bıyl mamyr aıynda ALEM ınnovatsııalyq apparatyn shyǵaratyn zaýyt qurylysy bastalǵany jóninde aqparat berildi. Qazaqstandyq ınjenerler men UMC Júrek ortalyǵy dárigerleriniń biregeı jumysy zamanaýı transplantologııadaǵy basty másele sanalatyn donorlyq organdy saqtaý ýaqytynyń shekteýliligin sheshýdi kózdeıdi.
Júrektiń ıshemııalyq aýrýlarynyń túrli formalaryn emdeý isine Nazarbaev ýnıversıteti tehnoparkiniń bazasynda iske asyrylǵan joba da óz úlesin qospaq. «IHT Central Asia» JShS-i ıspanııalyq Iberhospitex S.A kompanııasynyń tehnologııasyn ákelip, ınterventsıaldy kardıologııada qoldanylatyn koronarlyq stent pen ballondyq katater óndirisin jolǵa qoıdy.
Eira Med farmatsevtıkalyq kesheni Eýropa Odaǵy elderi men AQSh-tan keletin medıtsınalyq buıymdar ımportyn almastyrýmen jáne tehnologııany transferleýmen belsendi túrde aınalysady.
Budan bólek, Prezıdentke Kazecotech kásipornynyń ǵylymı-tehnıkalyq jetistikteri kórsetildi. Sońǵy úsh jylda kompanııa eń úzdik álemdik standarttarǵa saı keletin 250-den astam protez daıyndap, 500 adamdy Ottobock múgedek arbasymen qamtamasyz etken.
Kórmeni aralaǵan soń Qasym-Jomart Toqaev otandyq farmatsevtıka ındýstrııasy men medıtsına buıymdary óndirisin damytýdyń mańyzyn atap ótti.