Prezıdent medıtsına qyzmetkerlerine kúsh kórsetkeni úshin jazany kúsheıtýdi tapsyrdy

ASTANA. KAZINFORM — Memleket basshysy medıtsına qyzmetkerlerine kúsh kórsetetinderge qarsy zańdy kúsheıtýdi tapsyrdy. Bul týraly Qazaqstan Prezıdentiniń keńesshisi — baspasóz hatshysy Rýslan Jeldibaı jazdy.

— Memleket basshysy medıtsına qyzmetkerlerine kúsh qoldanyp jáne qatygezdik tanytqan áreketterge qatysty jazany qatańdatý maqsatynda ulttyq zańnamaǵa ózgerister engizý týraly Parlament depýtattarynyń, densaýlyq saqtaý salasy ókilderiniń jáne belsendi azamattardyń usynysyn qoldaıdy, — delingen habarlamada. 

Dárigerlerdiń densaýlyǵyna nuqsan keltirip, ómirine qaýip tóndiretin mundaı keleńsizdikterge «Zań jáne tártip» qaǵıdatyna sáıkes quqyqtyq turǵyda batyl túrde tosqaýyl qoıylýy kerek. 

— Prezıdent Úkimetke tıisti zańnamalyq túzetýler ázirleýdi tapsyrdy. Bul bastama Parlamentte azamattyq qoǵam ókilderimen birge talqylanady, — dep jazdy baspasóz hatshysy.

Eske sala keteıik, Májilis depýtaty Ashat Aımaǵambetov elde medıtsına qyzmetkerlerine kúsh kórsetý derekteri jıilep bara jatqanyn alǵa tartyp, bul máselege zań júzinde naqty ári qatań sharalar qabyldaý qajet ekenin aıtqan bolatyn.