Toqaev Majarstannyń Úkimet basshysymen qandaı máselelerdi talqylaǵanyn aıtty
«Búgin biz Majarstannyń Premer-Mınıstri Vıktor Orbanmen ózara is-qımyldardyń saıası, saýda-ekonomıkalyq jáne mádenı-gýmanıtarlyq salalaryndaǵy basym baǵyttaryn belgiledik. Strategııalyq keńes pen ekonomıkalyq yntymaqtastyq jónindegi úkimetaralyq komıssııanyń jumysyna basa mán berdik», - dedi Memleket basshysy.
Sonymen qatar ol aǵymdaǵy jyldyń 29-30 sáýirinde Nur-Sultan qalasynda strategııalyq keńestiń 3-otyrysyna qatysý úshin Majarstan Premer-Mınıstriniń orynbasary - Qarjy mınıstri Mıhaıl Varga bastaǵan bıznes delegatsııa ókilderiniń kelýi josparlanǵanyn aıtty.
«Bul shara eki el arasyndaǵy saýda-ekonomıkalyq jáne ınvestıtsııalyq seriktestikti odan ary keńeıtýge septigin tıgizedi dep sanaımyz», - dedi QR Prezıdenti.
Memleket basshysy Qazaqstan tarapy eki eldiń ekonomıkalyq damýyna septigin tıgizetin ınvestıtsııalyq jobalardyń sanyn arttyrýǵa múddelilik tanytatyndyǵyn basa aıtyp, majarlyq iskerlik toptardy elimizdegi qyzmetterin jandandyra túsýge shaqyrdy.
«Ol úshin elimizde qajetti barlyq jaǵdaı jasalǵan. Qolaıly ınvestıtsııalyq jáne iskerlik ahýal qalyptasyp, álemdik deńgeıdegi qyzmetterdi usynatyn «Astana» Halyqaralyq qarjy ortalyǵy tabysty jumys istep tur. Eýrazııalyq ekonomıkalyq odaqtyń biryńǵaı naryǵyna jáne Qytaıdyń alyp naryǵyna tikeleı enýge múmkindik bar. Bizdiń elordalarymyzdyń arasynda tikeleı áýe baǵdary ashylǵan. Bul baǵdar qazaqstandyqtardyń arasynda úlken tanymaldylyqqa ıe», - dedi Qasym-Jomart Toqaev.
Aıta keteıik, Qazaqstan Majarstannyń TMD elderi ishindegi 4-shi iri saýda seriktesi sanalady. 2018 jyldyń qorytyndysynda eki eldiń arasyndaǵy taýar aınalymy 139,2 mln dollardy qurady.
Majarstannyń «Sechenı» ulttyq kitaphanasynda Qazaq ádebıeti men mádenıeti ortalyǵy ashylǵan. Sonymen qatar qazaq tili Seged ǵylymı ýnıversıtetinde oqytylady. Jalpy jyl saıyn majar tarapy qazaqstandyq stýdentterge 250 bilim grantyn bóledi. Búginde bul elde 500-den astam qazaq jasy bilim alýda.
