Toqaev Majarstan premer-mınıstrine: Qazaqstan — sizdiń atamekenińiz

Memleket basshysy Qasym-Jomart Toqaev Qazaqstanǵa resmı saparmen kelgen Majarstan Premer-Mınıstri Vıktor Orbanmen keńeıtilgen quramdaǵy kezdesý kezinde eki eldiń baýyrlastyq baılanysy týraly aıtty, dep habarlaıdy Kazinform agenttigi. 

«Qazaqstan sizdiń atamekenińiz dep aıtýǵa bolady. Sebebi tamyryńyz osy jerden bastaý alady. Ózińiz qypshaqtarǵa óte jaqynsyz. Bul derekti qazaqtar jaqsy biledi. Sondyqtan sizge óte rızamyz. Sizdiń saparyńyz óte mańyzdy. Eki el arasyndaǵy yntymaqtastyqqa kúshti serpin beredi dep senemiz. Qazaq pen majar — ejelden syılastyǵy jarasqan týystas halyqtar. Eki eldiń tili, salt-dástúri, mádenıeti uqsas. Orta ǵasyrlarda Torǵaı dalasynan Eýropaǵa qonys aýdarǵan qypshaq taıpalarynyń urpaqtary búginde Majarstan aýmaǵynda ómir súrip jatyr. Biz muny maqtan tutamyz. Tarıhı tamyrlastyq jáne tyǵyz baılanystar búginde eki el arasyndaǵy yntymaqtastyqtyń tereńdeı túsýine negiz boldy. Birlesken kúsh-jigerimizdiń arqasynda qazaq-majar yqpaldastyǵy barlyq salada qarqyndy damydy», — dedi Memleket basshysy.

Qasym-Jomart Toqaev Qazaqstan osy baýyrlastyqty, ózara tıimdi qarym-qatynasty budan ári tereńdetýge múddeli ekenin atap ótti.

«Búgingi kelissóz ekijaqty strategııalyq seriktestikti odan ári damytýǵa tyń serpin beredi dep senemin», — dedi Prezıdent.

Buǵan deıin Aqordada Majarstan Premer-Mınıstrin qarsy alý saltanaty ótkenin jazǵan edik. 

Eske salsaq, keshe keshke Vıktor Orbandy Astana áýejaıynda vıtse-premer Serik Jumanǵarın kútip alǵan bolatyn.

Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.

Aıta ketý kerek, Astanada Túrki memleketteri uıymynyń H sammıti ótedi.

Oǵan Ázerbaıjan, Qyrǵyzstan, Túrkııa, Ózbekstan prezıdentteri, baqylaýshy memleketter — Majarstan men Túrikmenstan basshylary qatysady.