Toqaev Laos kompanııalaryn AHQO múmkindikterin paıdalanýǵa shaqyrdy
ASTANA. KAZINFORM — Qazaqstan Prezıdenti Qasym-Jomart Toqaev Laos kompanııalaryna Qazaqstan naryǵyna shyǵýdyń tıimdi jolyn usyndy, dep habarlaıdy Aqordanyń baspasóz qyzmeti.
Ol Laos kompanııalaryn «Astana» halyqaralyq qarjy ortalyǵynyń jeńildikterin barynsha paıdalanýǵa shaqyrdy.
— AHQO bıznes ashý men ınvestıtsııa tartýdyń halyqaralyq alańyna aınaldy. Onda álemniń 90-nan asa elinen kelgen 6300-den astam kompanııa tirkelgen. AHQO platformasy arqyly Qazaqstanǵa 27 mıllıard dollar ınvestıtsııa tartyldy. AHQO Laos kompanııalary úshin Qazaqstan naryǵyna shyǵatyn ári Ortalyq Azııadaǵy qyzmetin keńeıtetin tıimdi qural bola alady, — dedi ol.
Áńgimelesý kezinde mádenı-gýmanıtarlyq jáne týrızm salalaryndaǵy yqpaldastyq perspektıvasyna erekshe nazar aýdaryldy.
Eki eldiń joǵary oqý oryndary arasynda tyǵyz baılanys ornatýdyń, akademııalyq almasý men birlese kadr daıarlaý aıasyn keńeıtýdiń, suranysqa ıe laostyq mamandardy Qazaqstanda oqytýdyń áleýeti zor.
Buǵan deıin Qasym-Jomart Toqaev Laos basshylyǵynyń elimizge alǵashqy saparyn mańyzdy qadam retinde baǵalaǵanyn jazǵanbyz.
