Toqaev Qyzylordadaǵy shyny zaýytynyń qurylysyn aıaqtaýdy tapsyrdy
Memleket basshysymen júzdesýge 400-den astam qyzylordalyq qatysty. Júzdesý barysynda Qazaqstan Prezıdenti elimiz ben aımaq damýynda mańyzdy bolyp tabylatyn birqatar máselelerge toqtalyp ótti.
Syr óńirinde qazirgi tańda shyny zaýyty qurylysy júrgizilýde.
«Shyny zaýyty qurylysyn aıaqtaýymyz tıis. Óndiris ornynyń aýmaǵynda óz deńgeıindegi óndiris orny men bıznes-klasterdi damytý baǵytynda qolaıly jaǵdaı jasalýy qajet. «Baıterek» holdıngine jergilikti ákimdikpen birge qazaqstandyq tuńǵysh shyny zaýytyn iske qosýdy tapsyramyn», - dedi Qazaqstan Prezıdenti.
Negizinen burynnan Qyzylorda oblysy aýyl sharýashylyǵy salasyna kóńil bólingen. Aımaqtyń basty daqyly - kúrish óndirisin damytýda keıingi jyldarda aýqymdy jumystar atqarylyp keledi. Kúrish óndirisi kólemi 2 esege artty. Sondaı-aq, kúrish eksporty 10 esege artty. Aýyl sharýashylyǵy salasynyń áleýetin arttyrý baǵytynda birqatar is-sharalardy qolǵa alý josparlanyp otyr. Atap aıtqanda, jaz aılarynda Syr óńirinde sý tapshylyǵy kórinis beredi. Sondyqtan bul baǵytta sý qoımalaryn salý máselesi ózektiligin kórsetip otyr.
«Atalmysh máselege baılanysty Qazaqstan Respýblıkasy Úkimeti men oblys ákimdigi birige otyryp, naqty jumys júrgizýge tapsyrma beremin», - dedi Qasym-Jomart Toqaev.
Júzdesý barysynda aımaqta kásipkerlik damytý, iri kásiporyn qataryn arttyrý máselelerine nazar aýdaryldy. Bul baǵytta oblys basshylyǵynyń atqaratyn naqty mindetter belgilendi.
Júzdesýde Aral aýdandyq ardagerler keńesiniń tóraǵasy Ábilbaı Sadyqov QR Tuńǵysh Prezıdenti - Elbasy Nursultan Nazarbaevtyń óńirdiń áleýmettik-ekonomıkalyq jáne ekologııalyq máselelerin sheshý baǵytynda kórsetken qamqorlyǵyna rızashylyǵyn jetkizdi. Tuńǵysh Prezıdenti - Elbasynyń qoldaýymen júzege asqan Aral teńizin saqtap qalý jobasynyń birinshi kezeńi aıasynda Aral teńizindegi sý deńgeıi kóterilip, balyq sharýashylyǵy qaıta jandandy. Osylaısha jergilikti turǵyndar burynǵy kásibine qaıta oraldy.
Al Shıeli aýdany «Aqmaıa» sharýa qojalyǵynyń basshysy Dáýlet Jumbekov, «Araltuz» AQ basshysy Aıdynbek Taýasarov, aımaqtyq «Rýhanı jańǵyrý» ortalyǵynyń bólim basshysy Álıma Ábdiqalyqova, mánerlep syrǵanaýshy Elızabet Tursynbaeva memleket pen aımaq damýynyń túrli salalary jaıynda baıandap, ózderiniń usynystaryn jetkizdi.
Júzdesý sońynda elimiz ben Qyzylorda oblysynyń damýyna qosqany úshin bir top azamattar Qazaqstan Respýblıkasy Prezıdentiniń Alǵys hatymen marapattaldy. Olardyń qatarynda Qazaly aýdanyndaǵy «Syr marjany» JShS dırektory Minajadın Óteev, oblystyq kóp beıindi aýrýhananyń dárigeri Abdýlla Shúlenbaev, «Baq-Bereke» JShS dırektory Qaırat Ernazarov, mánerlep syrǵanaýshy Elızabet Tursynbaeva, Shıeli aýdany Nartaı óner mektebiniń dırektory Muhamedáli Bekpeıisov bar.
Biz budan buryn Qazaqstan Prezıdentiniń Qyzylorda oblysyna jumys sapary bastalǵanyn habarlaǵan edik.
Sondaı-aq, Memleket basshysy QR Prezıdenti Qyzylordada balalar aýrýhanasy men kúrish óndeý zaýytynda boldy.
Qasym-Jomart Toqaev Qyzylordadaǵy sol jaǵalaýdaǵy qurylys nysandarymen tanysty.