Toqaev Qytaı basshysyn Qazaqstanǵa resmı saparmen kelýge shaqyrdy

NUR-SULTAN. QazAqparat - Memleket basshysy Qasym-Jomart Toqaev QHR Tóraǵasy Sı Tszınpındi Qazaqstanǵa resmı saparmen kelýge shaqyrdy. Bul týraly QR Prezıdentiniń kómekshisi Murat Nurtileýov Ortalyq kommýnıkatsııalar qyzmetindegi brıfıngte aıtty, dep habarlaıdy QazAqparat tilshisi.

«Kelissózder barsynda Qasym-Jomart Kemeluly Qytaı tóraǵasyn Qazaqstanǵa resmı saparmen shaqyrdy. Onyń naqty merzimderin Syrtqy ister mınıstrligi dıplomatııalyq arnalarmen pysyqtaıtyn bolady. Sonymen qatar birqatar qytaı kompanııasy Qazaqstanǵa sapar shegýdi josparlap otyr. Olarmen biz jańa baǵyttarda jaqsy jumys isteýge sóz baılastyq», - dedi Prezıdent kómekshisi.

Sonymen qatar ol Qazaqstan Prezıdentiniń Qytaıǵa eki kúndik memlekettik sapary jemisti ótkendigin aıtty.

«Jalpy, Beıjińde, Hanchjoýda bolǵan baǵdarlama aldyn ala Prezıdent Ákimshiligi, Syrtqy ister mınıstrligi jáne basqa da memlekettik organdardyń qatysýymen daıyndalǵan tujyrymdarǵa tolyq sáıkes boldy dep aıta alamyz. Qos Memleket basshylary jyly jáne dostyq raıda kelissózder júrgizdi. Onyń barysynda dıplomatııalyq qatynastar ornatylǵan 27 jyldyń ishinde Qazaqstan men Qytaı arasynda ártúrli salada qol jetkizilgen eleýli nátıjeler joǵary baǵalandy», - dedi M.Nurtileýov.