Memleket basshysy qutqarýshylardy «beıbit kúnniń batyrlary» dep atady
ASTANA. KAZINFORM — Prezıdent Qasym-Jomart Toqaev qutqarýshylarǵa memlekettik marapattar tapsyrdy, dep habarlaıdy Aqordanyń baspasóz qyzmeti.
Memleket basshysy saltanatty jıynǵa qatysýshylardy Qutqarýshy kúnimen quttyqtap, tótenshe jaǵdaı salasynyń qyzmetshilerine rızashylyǵyn bildirdi.
— «Qutqarýshy» sóziniń maǵynasy — óte keń ári tereń. «Qutqarý» — árdaıym ıgi is jasaýmen, jaqsylyq isteýmen baılanysty uǵym. Adam ómirine arasha túsý, azamattardy qaýip-qaterden qorǵaý, oqys jaǵdaıǵa tap bolǵan adamdarǵa qol ushyn sozý, tipti, olardyń qorqynyshyn basyp, jubatý sóz aıtý — osynyń bári de naǵyz qutqarýshynyń boıynan tabylatyn asyl qasıetter. Sondyqtan halqymyz sizderdi, ıaǵnı elimizdiń barsha qutqarýshy mamandaryn beıbit kúnniń batyrlary dep ataıdy. Bul — shyn máninde ádiletti baǵa. Árıne, qutqarýshy bolý kóptiń alǵysyna bóleıtin abyroıly jáne mártebeli qyzmet ekeni sózsiz. Alaıda azamattyq qorǵanys salasynda adal eńbek etý báriniń qolynan kele bermeıtin sharýa ekenin de umytpaýymyz qajet. Batyl, qaısar, shıraq ári ójet bolý — óz aldyna óte mańyzdy talap ekeni daýsyz. Biraq qutqarýshy eń aldymen elge jany ashıtyn otanshyl azamat jáne bilikti maman bolýǵa tıis. Osyndaı kúrdeli jumysty rýhy myqty, jaýapkershiligi joǵary, júrekti adamdar ǵana tańdaıdy, — dedi Prezıdent.
Qasym-Jomart Toqaev tótenshe jaǵdaı salasynyń qyzmetshileri eshqandaı qaýip-qaterden taısalmaıtyn, syn-saǵatta jedel sheshim qabyldaı alatyn, arnaıy daıarlyqtan ótken naǵyz kásibı mamandar dep esepteıtinin aıtty.
— Qutqarýshylardyń eńbegi qashanda elimizdiń kóz aldynda. Sizder kún saıyn táýekelge baryp, kásibı mindet pen jaýapkershilikti bárinen bıik qoıasyzdar. Basqasha aıtqanda, ot pen sýdyń ortasynda júresizder. Tótenshe jaǵdaıǵa túsken adamdarǵa járdem berip, olardy qıyndyqtan qutqarý úshin qajymaı qyzmet etesizder. Qutqarýshylar kez kelgen tótenshe jaǵdaıda birinshi bolyp kómekke umtylady. Olar ózgeniń ómirin saqtaý úshin, óz ómirin qaterge tigedi. Bul — naǵyz qutqarýshyǵa tán batyrlyq. Men Memleket basshysy retinde sizderdiń eren eńbekterińiz qoǵamymyzdyń aıryqsha syı-qurmetine laıyqty dep sanaımyn, — dedi Prezıdent.
Buǵan deıin Qaraǵandydaǵy órt kezinde 24 adamdy evakýatsııalaýǵa qatysqan feldsher týraly jazǵanbyz.
