Toqaev Quryltaı saılaýyna quttyqtaý joldaǵan sheteldik kóshbasshylarǵa alǵys aıtty
ASTANA. KAZINFORM — Prezıdent Qasym-Jomart Toqaev Táýelsiz Qazaqstan tarıhyndaǵy alǵashqy bir palataly Quryltaı saılaýynyń sátti ótýine baılanysty jyly lebizderin joldaǵan Reseı Prezıdenti Vladımır Pýtınge, Qyrǵyzstan Prezıdenti Sadyr Japarovqa, Ázerbaıjan Prezıdenti Ilham Álıevke, Ózbekstan Prezıdenti Shavkat Mırzıeevke, Tájikstan Prezıdenti Emomalı Rahmonǵa rızashylyǵyn jetkizdi. Bul týraly Aqorda málim etti.
Memleket basshysy bul parlament saılaýy Qazaqstan azamattarynyń yntymaǵyn baıqatyp, halqymyzdyń, ásirese, óskeleń urpaqtyń jarqyn keleshegi úshin joǵary deńgeıde jaýapkershilik tanytqanyn, naǵyz otanshyldyq úlgisin pash etkenin atap ótti.
Qasym-Jomart Toqaevtyń pikirinshe, Qazaqstannyń jan-jaqty jańǵyrýy, saıası jáne ekonomıkalyq reformalar úzdiksiz júrgiziletin úrdiske aınaldy. Quryltaı saılaýynyń qorytyndysy kórsetkendeı, elimizdiń baǵyt-baǵdaryn azamattardyń basym bóligi qoldaıdy. Bul Ádiletti, Ozyq, Taza Qazaqstan qurý jónindegi jospardy oıdaǵydaı oryndaýǵa senimdi kepil bolady.
Prezıdent Qasym-Jomart Toqaev dostas memleketter basshylarynyń óz elderin ornyqty damytýǵa baǵyttalǵan jobalary men baǵdarlamalaryn tabysty júzege asyrýyna tilektestik bildirdi.
Sondaı-aq Memleket basshysynyń atyna ShYU, TMD, UQShU, EAEK, EYU, TÚRKSOI jáne basqa da halyqaralyq uıymdar jetekshileriniń quttyqtaýlary kelip tústi.
Aıta keteıik, Quryltaı saılaýynyń qorytyndysy saılaý ótkizilgen kúnnen bastap 10 kúnnen keshiktirilmeıtin merzimde belgilenedi.
