Toqaev Qorǵanys mınıstrine birqatar kezek kúttirmeıtin mindet júktedi

Birinshi mindet — bıýdjet qarajatynyń tıimdi jumsalýyn qamtamasyz etý.

— Bólingen qarjy memlekettiń qorǵanys qabiletin arttyryp, barynsha nátıje berýge tıis. Maqsatsyz shyǵynǵa, talan-tarajǵa jol berilmeıdi. Mundaı áreketi áshkerelengenderdiń birde-bireýi jaýapkershilikten qutylmaıdy, — dedi Qasym-Jomart Toqaev.

Ekinshi mindet — qazirgi zamanǵy qaýip-qaterlerdi eskere otyryp, Qarýly Kúshterdi reformalaý. Qaýipsizdik Keńesiniń Apparaty Qorǵanys mınıstrligimen birlesip, on kún ishinde áskerdi reformalaý jóninde arnaıy jospar ázirleýge tıis. Sondaı-aq Memleket basshysy mamandardy irikteý men baǵalaýdyń ashyq krıterıılerin engizgen jón dep sanaıdy.

— Áskerı laýazymdarǵa basshynyń «óz adamdary» emes, tájirıbeli jáne bilikti kadrlar usynylýǵa tıis, — dedi Prezıdent.

Úshinshi mindet — ásker qataryndaǵy ıdeologııa jáne tárbıe jumysyn kúsheıtý. Bul is Konstıtýtsııanyń basty qaǵıdattary men qundylyqtaryna sáıkes júrgizilýge tıis. Sondaı-aq álemniń áskerı tarıhy, ultymyz ben jahan elderiniń ozyq rýhanı-mádenı jetistikteri keńinen dáriptelýi kerek. Armııa kásibı daıarlyq pen bilimdi shyńdap, otanshyldyqqa baýlıtyn mektep bolǵany jón. Onda árbir áskerı qyzmetshiniń ómiri men qaýipsizdigi bárinen joǵary turýy qajet.

— Otan qorǵaý — ár azamattyń qasterli boryshy, qasıetti paryzy. Áskerı qyzmetke ómirin arnaǵan ár azamat memlekettiń qamqorlyǵy men qoldaýyn aıqyn sezinýi kerek. Ásker — qorqynysh pen úreıge toly jer bolmaýy kerek. Ásker — jas sarbazdardy, elimizdiń naǵyz otanshyl azamattaryn tárbıeleýdiń burynǵy jáne qazirgi ozyq úlgileri ushtasqan kásibı deńgeıi joǵary ınstıtýt bolýǵa tıis, — dedi Memleket basshysy.

Prezıdenttiń paıymdaýynsha, BAQ áskerı qyzmet, ásirese, basshylyqtyń joǵary baǵasy men qoldaýyna ıe bolǵan áskerı qyzmetshiler týraly obektıvti aqparat taratqany jón. Joǵarǵy Bas Qolbasshy naqty ári túsinikti, kezeń-kezeńimen reformalaý josparyn ázirleý mańyzdy ekenine nazar aýdardy. Ony kólemdi tujyrymdamaǵa nemese jol kartasyna aınaldyrýǵa bolmaıdy. Reforma jospary qazan aıynyń ekinshi jartysynda ótetin Qaýipsizdik Keńesiniń otyrysynda qaralady. Prezıdent Qaýipsizdik Keńesiniń Apparatyna áskerdi reformalaý úderisin úılestirýdi tapsyrdy.

Eske salaıyq, buǵan deıin Prezıdent Dáýren Qosanovty Qorǵanys mınıstri laýazymynan bosatqanyn habarlaǵan edik.

Onyń ornyna Aıdos Myrzahmetov Qorǵanys mınıstri bolyp taǵaıyndaldy.

Prezıdent jańa mınıstrge áskerı basqarý júıesin jetildirýdi tapsyrdy.