Toqaev: Koreıanyń Qazaqstanǵa salǵan ınvestıtsııasy 12 mıllıard dollardan asty
ASTANA. KAZINFORM — Memleket basshysy Qazaq-koreı dóńgelek ústeliniń ashylýynda sóz sóıledi. Bul týraly Aqorda málim etti.
Prezıdent Qazaqstan men Koreıa Respýblıkasy iskerlik orta ókilderi bas qosqan jıynnyń qatysýshylaryna iltıpat bildirdi.
Qasym-Jomart Toqaev sońǵy otyz jylda Astana men Seýl arasynda ózara qurmetke, senimge jáne shynaıy dostyqqa negizdelgen berik qarym-qatynas ornaǵanyn atap ótti.
Onyń aıtýynsha, atalǵan seriktestiktiń irgesin belsendi saıası dıalog pen san qyrly yntymaqtastyqty odan ári tereńdetý jolyndaǵy ortaq ustanym bekemdeı tústi.
— Búginde Koreıa Qazaqstannyń iri saýda jáne ınvestıtsııalyq seriktesteriniń qataryna kiredi. Koreıalyq kompanııalardyń bizdiń eldegi nátıjeli qyzmetin joǵary baǵalaımyz ári bul oń úrdisti nyǵaıta beremiz. Koreı bıznesmenderi ınvestıtsııa máselesinde anaǵurlym shıraq ári batyl qımyldaıtynyn, joǵary adamgershiligimen, Qazaqstanǵa degen syılastyǵymen erekshelenetinin únemi aıtyp júremin, — dedi Prezıdent.
Qasym-Jomart Toqaev ótken jyly ekijaqty taýar aınalymy 3 mıllıard dollardan asqanyna nazar aýdardy. Prezıdenttiń pikirinshe, úkimetter men kompanııalar kúsh-jiger biriktirse, bul kórsetkishti eseleı túsýge bolady.
— Koreıa Qazaqstanǵa 12 mıllıard dollardan astam ınvestıtsııa quıdy. Elimizde Samsung, Kia, Hyundai, Lotte, Doosan Enerbility, Shinhan Bank sekildi koreı kapıtalynyń úlesi bar myńnan asa kompanııa jumys isteıdi. Biz qarym-qatynasymyzdy múldem jańa deńgeıge kóterip, dostyq ári seriktestik baılanystardy barynsha nyǵaıtýǵa nıettimiz. Búgingi sapar osyǵan deıingi jetistikterimizdi túıindep, ózara yqpaldastyqqa tyń serpin berýge oraıly múmkindik berip otyr, — dedi Memleket basshysy.
Qasym-Jomart Toqaev qazaqstandyqtar Prezıdent Lı Chje Meńniń jańa ónerkásip strategııasynyń, sonyń ishinde Three Mega Projects jáne Seven Major SEED initiative sekildi bastamalardyń iske asý barysyn asqan qyzyǵýshylyqpen baqylap otyrǵanyn jetkizdi.
Budan keıin Prezıdent Qazaqstannyń ekonomıkalyq jańǵyrý strategııasyna egjeı-tegjeıli toqtalyp, qazaq-koreı qarym-qatynasyn odan ári ilgeriletetin basym baǵyttardy atady.
— Ónerkásip salasyndaǵy yqpaldastyq ekonomıkalyq seriktestigimizdiń berik negizine aınaldy. Búginde ortaq portfelde avtomobıl qurastyrý, mashına jasaý, metallýrgııa jáne basqa da salalardy qamtıtyn 51 birlesken joba bar. Olardyń jalpy quny 4 mıllıard dollardan asady. Koreıalyq kompanııalardyń tájirıbesi Qazaqstannyń básekege qabiletti ári senimdi óndiris alańy ekenin anyq dáleldedi. Byltyr elimizde 170 myńǵa jýyq avtomobıl shyǵaryldy. Bul — ulttyq deńgeıdegi rekord. Onyń basym bóligi Hyundai jáne Kia kompanııalaryna tıesili. Elimizde atalǵan avtobrendterdiń jeńil jáne júk kólikteri, avtobýstary qurastyrylady. Budan bólek, Qazaqstanda koreıalyq turmystyq tehnıka óndirisi órkendep keledi. Qazirgi kezde Samsung turmystyq tehnıkalary jergilikti zaýyttarda óndiriledi. Osylaısha, koreıalyq kompanııalar elimizge kóptep kele bastady. Maqsatymyz — tolyqtaı ıntegratsııalanǵan, ıaǵnı, bólshekterdiń, ozyq materıaldardyń, elektr qural-jabdyqtary men elektronıkanyń jergilikti óndirisin túgel qamtıtyn, keń aýqymdy Eýrazııa naryǵyna qyzmet kórsete alatyn ónerkásip ekojúıesin qurý. Koreıalyq kompanııalardy osy múmkindikti paıdalanyp, Qazaqstannan óndiris oryndaryn ashýǵa shaqyramyn, — dedi Qasym-Jomart Toqaev.
Qurylys jáne qala damýy yntymaqtastyqtyń taǵy bir perspektıvti baǵyty retinde ataldy.
— Sizdiń el qurylys, ınjınırıng jáne ınfraqurylymdy damytý salalarynda álemdik deńgeıdegi tájirıbege ıe. Koreıalyq kompanııalar kúrdeli jobalardy tez, sapaly ári ozyq tehnologııalar arqyly iske asyrýymen tanymal. Qazirgi tańda Qazaqstan ınfraqurylymdy jańǵyrtýdyń mańyzdy kezeńine qadam basty. Biz kólik, kommýnaldyq sharýashylyq ınfraqurylymynan bastap turǵyn úı jáne áleýmettik nysandarǵa deıingi barlyq baǵytta qurylys qarqynyn jandandyrýdy josparlap otyrmyz. Muny Prezıdent laýazymyndaǵy basym mindetterimniń biri dep sanaımyn. Maqsatymyz — Qazaqstandy alyp qurylys alańyna aınaldyrý. Aýrýhana, balalardyń ońaltý ortalyǵy, kópbeıindi medıtsına mekemeleri, zamanaýı mektepter, sport ǵımarattary sekildi áleýmettik nysandar men kólik ınfraqurylymyn jetildirýge erekshe mán beremiz. Bul — koreıalyq korporatsııalarǵa tyń múmkindik. Olar Qazaqstandaǵy aýqymdy jobalarǵa belsene atsalysady dep oılaımyz. Úkimetimiz ózara tıimdi sharttar negizinde jańa kásiporyndar qurýǵa jáne ınvestıtsııalyq bastamalardy ilgeriletýge baǵyttalǵan osy tektes iri jobalardyń naqty tizimin jasaqtaıdy, — dedi Prezıdent.
Eske sala keteıik, Qasym-Jomart Toqaev Koreıa Respýblıkasyna memlekettik saparmen bardy.
Prezıdent Qasym-Jomart Toqaev Koreıanyń birqatar azamatyn marapattady.
Toqaev pen Pan Gı Mýn BUU reformasy týraly pikir almasty.
