Toqaev Koreıaǵa Qazaqstandaǵy sırek metaldar jobalaryna ınvestıtsııa salýdy usyndy
ASTANA. KAZINFORM — Memleket basshysy «Ortalyq Azııa – Koreıa Respýblıkasy» bıznes-sammıtinde asa mańyzdy materıaldar salasyndaǵy seriktestikke nazar aýdaryp, Qazaqstan mıneraldar men sırek kezdesetin metaldar kenine baı ekenin aıtty. Bul týraly Aqordanyń baspasóz qyzmeti málim etti.
— Biz Koreı Úkimeti strategııalyq basymdyqqa ıe resýrstar dep tanyǵan mys, hrom, tıtan jáne basqa da elementterdi óndiremiz. Al Koreıanyń ozyq tehnologııany órkendetýde mol tájirıbesi bar. Osyny eskerip, geologııalyq barlaý, ken ıgerý, asa mańyzdy materıaldardy tereń óńdeýge qatysty tolyq tsıkldi ınvestıtsııalyq jobalardyń tizimin jasaqtaýdy usynamyn, — dedi Memleket basshysy.
Prezıdent kólik baılanysyn keńeıtý máselesin óte ózekti dep sanaıdy. Osy oraıda, Ortalyq Azııanyń geografııalyq turǵydan ońtaıly ornalasýy tutas Eýrazııanyń kólik-logıstıka júıesin nyǵaıtýǵa mol múmkindik beredi.
— Bul iste Transkaspıı halyqaralyq kólik baǵytynyń mańyzy zor. Onyń basym bóligi Qazaqstan aýmaǵymen ótedi. Búginde Azııa men Eýropa arasyndaǵy qurlyq arqyly tasymaldyń 85 paıyzǵa jýyǵy atalǵan baǵdarǵa tıesili. Ótken jyly Orta dáliz boıymen konteınerlik tasymal kólemi 36 paıyzǵa kóbeıdi. Bıylǵy 8 aıda 18 paıyz shamasynda aıtarlyqtaı ósim kósetti. Aldaǵy eki jylda baǵdardyń ótkizý qabiletin 6 mıllıon tonnadan 10 mıllıon tonnaǵa deıin ulǵaıtýdy josparlap otyrmyz. Koreı kompanııalary osy baǵyt boıyndaǵy ınfraqurylymdyq jobalardy ilgeriletýge atsalysa alady. Qazaqstan Úkimeti koreı seriktesterimizge arnalǵan ınvestıtsııalyq jobalar portfelin jasaqtaýda, — dedi Qasym-Jomart Toqaev.
Buǵan deıin Qazaqstanǵa Ortalyq Azııadaǵy sheteldik ınvestıtsııanyń 70 paıyzyna jýyǵy tıesili ekenin jazdyq.
