Toqaev Kongo Prezıdentine: Astanaǵa arnaıy kelýińiz qazaq eline degen qurmettiń kórinisi

ASTANA. KAZINFORM — Qazaqstan men Kongo arasyndaǵy qarym-qatynastyń keleshegi zor. Bul týraly Aqordada elimizge memlekettik saparmen kelgen Kongo Demokratııalyq Respýblıkasynyń Prezıdenti Felıks Chısekedımen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty. 

— Eń aldymen Qazaqstanǵa qosh keldińizder dep aıtqym keledi. Shaqyrýymdy qabyl alǵanyńyz úshin ózińizge shynaıy rızashylyǵymdy bildiremin. Bul sizdiń Qazaqstanǵa alǵashqy saparyńyz. Muny tarıhı sát dep aıtýǵa bolady. Uzaq jol júrip, Astanaǵa arnaıy kelýińiz qazaq eline degen qurmettiń kórinisi. Biz muny joǵary baǵalaımyz. Dıplomatııalyq qatynastar ornaǵaly kóp bolǵan joq — 3 jyl boldy. Soǵan qaramastan ózara senim men dostyqqa negizdelgen yntymaqtastyqty damytyp jatyrmyz. Búgingi kelissózder Astana men Kınshasa arasyndaǵy baılanysty jańa beleske kóteredi, tıimdi áriptestik ornatýǵa múmkindik beredi, — dedi Memleket basshysy.

Prezıdenttiń atap ótýinshe, Kongo Demokratııalyq Respýblıkasy Qazaqstannyń Afrıkadaǵy mańyzdy seriktesi. Kongo Afrıka qurlyǵynyń, al Qazaqstan Orta Azııanyń dál ortasynda ornalasqan.

— Sondyqtan bizdiń eki el arasyndaǵy qarym-qatynastyń keleshegi zor dep oılaımyn, — dedi Qasym-Jomart Toqaev.

Buǵan deıin Aqordada Memleket basshysy Qasym-Jomart Toqaev Kongo Demokratııalyq Respýblıkasynyń Prezıdentin qarsy alǵanyn jazǵan edik.