Toqaev: Kók baıraǵymyz, tólqujatymyz jáne memlekettik tilimiz bizdiń birtutas halyq ekenimizdi bildiredi
ASTANA. QazAqparat – Qoǵamda jańa qundylyqtar ornyqtyryp, jaqsy qasıetterge ıe bola almasaq, reformanyń bári beker. Bul týraly ulyqtaý rásiminde Qazaqstan Respýblıkasynyń Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Bir sózben aıtsam, kásibılik, adaldyq jáne qarapaıymdylyq bizdiń basty qaǵıdattarymyz bolýǵa tıis. Qoǵamda jańa qundylyqtar ornyqtyryp, jaqsy qasıetterge ıe bola almasaq, reformanyń bári beker. Kók baıraǵymyz, tólqujatymyz jáne memlekettik tilimiz bizdiń birtutas halyq ekenimizdi bildiredi», - dedi Qasym-Jomart Toqaev.
Osy oraıda Prezıdent babalarymyz birtutas el bolyp, Eýrazııa tórinde dańqty shejiresin at tuıaǵymen jazǵanyn, Altyn orda men Qazaq handyǵy sııaqty memleketter qurǵanyn eske saldy.
«Sondaı-aq, halqymyz el basyna kún týǵan kúrdeli sátterde azattyǵy úshin arpalysty. Áıgili handarymyzdyń, batyrlarymyzdyń jáne ult qaıratkerleriniń erligi – osynyń aıqyn kórinisi», - dedi Memleket basshysy.
