Toqaev: Qoǵamdyq kelisimdi saqtaý — elimizdiń árbir azamatynyń perzenttik paryzy

ASTANA. QazAqparat - Bizde saıası kózqarasy ártúrli partııalar bar. Plıýralızm memleketti evolıýtsııalyq jolmen damytýǵa múmkindik beredi. Memleket basshysy Qasym-Jomart Toqaev Parlament Senatynyń otyrysynda osyndaı pikir bildirdi, dep habarlaıdy Aqordanyń baspasóz qyzmeti.

«Plıýralızm memleketti evolıýtsııalyq jolmen damytýǵa múmkindik beredi. Bizde saıası kózqarasy ártúrli partııalar bar. Kandıdattardyń túrli másele boıynsha ustanymdarynyń birdeı bolmaýy da zańdy qubylys. Biraq, kózqarastary múlde qabyspaıtyn ymyrasyz qarsylastardyń ózine ortaq qundylyqtar bar. Ol – bizdiń qasıetti Otanymyz jáne qasterli Táýelsizdigimiz.
Men bul týraly «Táýelsizdik bárinen qymbat» atty maqalamda aıttym. Óıtkeni, Táýelsizdik úshin kúres kúndelikti eńbekpen jáne eldik saıasatpen tyǵyz baılanysyp jatyr. Bolashaqtyń aldynda bárimiz birdeı jaýap beremiz. Keıingi urpaq kimniń saıası ustanymy qandaı bolǵanyna mán beredi.
Aǵa býynnyń olarǵa qandaı memleketti mıras etkenine qarap, búgingi kúnin baǵalaıtyn bolady. Sondyqtan, biz ortaq maqsat jolynda birigýimiz kerek», - dedi QR Prezıdenti.

Odan bólek, Prezıdent saıası múddege qaraǵanda memleketshildik qasıet áldeqaıda bıik turý keregin atap ótti.

«Kez kelgen saıası múddege qaraǵanda memleketshildik qasıet áldeqaıda bıik turýǵa tıis. Qoǵamǵa, eń aldymen, árbir sózine jáne isine jaýapkershilikpen qaraıtyn saıasatkerler qajet. Sonda azamattardyń eldik saıasatqa degen senimi artady. Al, senim – bul asa mańyzdy qundylyq.

Bizdiń elimizge zań ústemdigi jáne azamattyq tártip asa qajet. Baýyrjan Momyshuly «Tártipke baǵynǵan qul bolmaıdy» dep aıtqan. Zańdy syılaıtyn eldiń qashanda upaıy túgel», - dedi ol.

Sondaı-aq, Memleket basshysy qoǵamdyq kelisimdi saqtaý elimizdiń árbir azamatynyń perzenttik paryzy ekenin eske saldy.

«Shyn máninde, tatýlyq pen turaqtylyq eń asyl qundylyq ekenine bárimiz kóz jetkizdik. Tynyshtyq bolmasa, basqa tabystyń bári bir sátte qurdymǵa ketetinin kórdik. Biz el birliginiń arqasynda barlyq qıyndyqty jeńip kelemiz. Sondyqtan, bardy baǵalap, yrysty yntymaǵymyzdy qorǵaý – bárimizge ortaq qasıetti borysh.

Biz bir-birimizge qamqor, janashyr bolyp, jaqsylyqqa umtylýymyz kerek. Qoǵamdyq kelisimdi saqtaý memlekettik organdardyń ǵana mindeti emes. Bul – elimizdiń árbir azamatynyń perzenttik paryzy. Biz ne istesek te, el múddesi úshin jasaımyz.

Maqsatymyz – Qazaqstandy tuǵyry berik, ekonomıkasy qýatty, rýhy asqaq, birligi bekem memleket retinde urpaqqa tabystaý. Osy tarıhı mindetti bárimiz birge abyroımen atqaryp shyǵamyz dep senemin», - dep atap ótti ol.

Foto: t.me/aqorda_resmi