Toqaev qoǵamdaǵy máselelerdi tereń túsinetinin uqtyrdy - Baqytjan Jumaǵulov
«Biz Prezıdenttiń tanystyrylýy sekildi mańyzdy is-sharaǵa qatysyp otyrmyz. Bul - bıliktiń beıbit túrde berilýi. Halyq Qasym-Jomart Toqaevqa daýys berip, óz kózqarasyn bildirdi. Qasym-Jomart Toqaevtyń sóz sóıleýinde birneshe negizgi baǵyttar naqty aıtyldy. Bul, eń aldymen, adamdarǵa qamqorlyq der edim. Prezıdent qoǵamymyzda bar máselelerdi, qıyndyqtardy tereń túsinetinin uqtyrdy. Áńgime adamǵa qamqorlyq, ony jumysqa ornalastyrý týraly aıtylyp otyr. Ekinshiden, densaýlyq jaǵdaıyna baılanysty eńbek ete almaıtyn adamdarǵa qamqorlyq kórsetilmek. Eń bastysy - adam kapıtaly. Densaýlyq saqtaý, bilim berý, pedagogtar men dárigerlerdiń mártebesin arttyrý - osy barlyq baǵyttar boıynsha Toqaev memleketti damytý kerektigin túsinedi», - dedi Baqytjan Jumaǵulov QR Prezıdenti ulyqtaý rásiminen keıin sóılegen sózinde.
Spıker Memleket basshysynyń el jastaryna arnaǵan úndeýine de toqtaldy.
«Qasym-Jomart Toqaev jastarǵa, onyń keleshegine senim artyp otyr. Jastardyń kadrlyq rezervi qurylýy tıis. Jastar qyzmettik satymen ósedi. Biz elimizdiń damýyndaǵy jańa kezeń - adamdarǵa qamqorlyq ýaqyty kelgenin sezindik», - deıdi ol.
Senator Memleket basshysynyń bilim júıesin jańǵyrtý jónindegi ıdeıasyn da aınalyp ótpedi.
«Álem jyldam ózgerip barady. Barlyǵy birden bola qoımasy anyq. Biraq, Qasym-Jomart Toqaev bul salany tereń túsine otyryp, naqty mindet qoıyp otyr - úzdik álemdik standarttar boıynsha bilim berý júıesin jańǵyrtý kerek. Alaıda, bilim berýdegi bizdiń ulttyq jetistikterimizdi umytpaý kerektigin de tilge tıek etti. Prezıdent pedagog mártebesin kóterý mindetin naqty qoıdy. Óıtkeni pedagog qoǵamda erekshe qurmetke ıe bolýy tıis», - dedi B. Jumaǵulov.
Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótti. Q. Toqaevty ulyqtaý rásimine Úkimet músheleri, Parlament depýtattary, Konstıtýtsııalyq Keńes músheleri, Joǵarǵy Sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysty.
Táýelsizdik saraıynda Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.
