Toqaev klımatqa baılanysty Ortalyq Azııa elderiniń jobalyq keńsesin qurýdy usyndy
«Kúsh-jigerimizdi jumyldyrmaı, Ortalyq Azııadaǵy klımattyń ózgerý saldaryn eńserý múmkin emes. Sondyqtan birlesken is-qımyldardy úılestirý úshin Qorshaǵan ortany qorǵaý jáne aımaqtaǵy klımattyń ózgerýine qatysty kelisilgen saıasat júrgizý jónindegi Ortalyq Azııa elderiniń jobalyq keńsesin qurýdy usynamyz. Múmkindikti paıdalanyp, osy ózekti máselege qatysty asa mańyzdy derekter keltire keteıin. Úkimetaralyq sarapshylar tobynyń klımattyń ózgerýi jónindegi 1,5 gradýs týraly arnaıy baıandamasynda ǵasyr sońynda Ortalyq Azııadaǵy temperatýra Tselsıı baǵany boıynsha 6 gradýsqa deıin kóteriledi dep boljanǵan. Bul jahandyq temperatýranyń boljamdy kóterilýinen eki ese artyq», - dedi Qazaqstan Prezıdenti Ortalyq Azııa memleketteri basshylarynyń IV Konsýltatıvtik kezdesýinde.
Memleket basshysynyń dereginshe, qazirgi tańda Qazaqstan Respýblıkasynda 2724 muzdyq bar.
«Eń úlkeni Tuıyqsý muzdyǵynyń kólemi sońǵy 38 jylda 1 shaqyrymǵa deıin kishireıgen. Bul muzdyq jyl saıyn 58 mıllıon tonna kóleminiń shamamen 1 mıllıon tonnasyn joǵaltady. Bul 2040 jylǵa qaraı sý resýrstarynyń 20 paıyzdan astam azaıýyna alyp keledi», - dedi Qasym-Jomart Toqaev.
