Toqaev: Qytaımen energetıkalyq kelisim bekitýge daıyndalamyz

ASTANA. KAZINFORM – Prezıdent Qasym-Jomart Toqaev Táýelsizdik saraıyndaǵy «Ortalyq Azııa-Qytaı» sammıtinde Qazaqstan Qytaımen energetıka salasyndaǵy turaqty yntymaqtastyqty damytýǵa arnalǵan kelisimge qol qoıatynyn málim etti.

- Energetıka salasyndaǵy yntymaqtastyqtyń áleýeti óte zor. Biz ozyq tehnologııalarmen almasýdy jandandyrý jáne energetıkalyq ınfraqurylymdy jańǵyrtý jobalaryna úmit artamyz. Sondaı-aq óńirlik energetıkalyq qaýipsizdikti nyǵaıtýǵa, energetıka kózderin tehnologııalyq turǵydan damytyp, ártaraptandyrýǵa nazar aýdarǵan jón, - dedi Qasym-Jomart Toqaev.

Memleket basshysy ekijaqty yntymaqtastyq jańartylatyn energııa kózderi boıynsha da kelesheginen úmit kúttiretin jobalardy qamtıtynyn atap ótti.

- Qytaı Halyq Respýblıkasynyń atom energetıkasyn damytýdaǵy tabysty, mol tájirıbesin eskersek, biz osy strategııalyq saladaǵy turaqty yntymaqtastyqty damytýǵa múddelimiz. Eń jaqyn arada kelisimge qol qoıýǵa daıyndalamyz. Sondaı-aq jasyl klaster qurý, jańartylatyn energııa kózderin paıdalaný baǵyttarynda perspektıvaly jobalar bar, - Memleket basshysy.

Astanada «Ortalyq Azııa – Qytaı» ІІ sammıti ótip jatyr. 

Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.