Toqaev qytaılyq kompanııamen «Kóljat» ken ornyn keshendi ıgerýdi talqylady
ASTANA. KAZINFORM — Qasym-Jomart Toqaev Xinfa Group kompanııasynyń prezıdenti Chjan Gýıchýndy qabyldady.
Aqordanyń baspasóz qyzmetiniń habarlaýynsha, kezdesýde Memleket basshysy elimizdiń uzaqmerzimdi yntymaqtastyqqa, Qazaqstanda zamanaýı tehnologııalardy engizýge jáne óndiristi damytýǵa beıil iri ınvestorlarmen jumys isteýge qyzyǵýshylyq tanytatynyn jetkizdi.
Osy oraıda, Prezıdent metallýrgııa jáne kómir hımııasy salalarynda tolyq óndiristik tizbekke ıe Xinfa kompanııasymen yqpaldastyqqa ázir ekenin rastady. Qasym-Jomart Toqaev bul tásil elimizdi ındýstrııalyq turǵydan damytý basymdyqtaryna saı keletinin aıtty.
Kezdesýde Almaty oblysyndaǵy «Kóljat» ken ornyn ıgerý perspektıvasy qarastyryldy. Bul jumys qazaq-qytaı óndiristik kooperatsııasynyń jańa kezeńge qadam basqanyn kórsetedi.
Prezıdent ken ornyn keshendi ıgerýge nazar aýdardy. Atap aıtqanda, munda jartylaı koks, sýtegi, sıntez-gaz, joǵary sapaly munaı ónimderin óndirý arqyly ıntegratsııalanǵan óndiris tizbegin qurǵan jón. Atalǵan joba arqyly 2 myńǵa jýyq jumys ornyn ashýǵa bolady.
Qasym-Jomart Toqaev pen Chjan Gýıchýn asa mańyzdy materıaldar salasynda seriktestikti nyǵaıtý máselesin talqylady.
Chjan Gýıchýn Xinfa Group kompanııasynyń áriptestikti keńeıtý josparyn tanystyryp, birlesken jobalarǵa qoldaý kórsetkeni úshin Memleket basshysyna alǵys aıtty.
Eske salaıyq, munyń aldynda Prezıdent Fufeng Group kompanııasy dırektorlar keńesiniń tóraǵasy Lı Sıýechýndi qabyldaǵanyn habarlaǵan edik.
