Toqaev Qytaı kompanııasynyń basshysymen Aqtoǵaıdaǵy zaýyt qurylysyn talqylady
ASTANA. KAZINFORM — Memleket basshysy SNMC kompanııasy dırektorlar keńesiniń tóraǵasy Ven Gandy qabyldady.
Aqordanyń baspasóz qyzmetiniń habarlaýynsha, Qasym-Jomart Toqaev Qazaqstannyń ındýstrıaldyq áleýetin damytýǵa China Nonferrous Metal Mining tobynyń atsalysýyn joǵary baǵalady. Kompanııa halyqaralyq taý-ken jáne metall óndirisinde mol tájirıbe jınaqtaǵan.
Prezıdent Aqtoǵaı ken ornynda mys balqytý zaýyty salyna bastaǵanyn erekshe mańyzdy oqıǵa dep atady. Bul joba Abaı oblysynyń ekonomıkasyn jáne Qazaqstannyń óńdeý ónerkásibin órkendetýge tyń serpin beredi.
Memleket basshysy atap ótkendeı, Qytaı Qazaqstannyń saýda-ınvestıtsııa salalaryndaǵy negizgi strategııalyq jáne ekonomıkalyq seriktesteriniń biri sanalady, al búgin bastalǵan zaýyt qurylysy eki eldiń yntymaqtastyǵy qarqyndy ilgerilep kele jatqanyn kórsetedi.
SNMC basshysy Ven Gan aýqymdy jobany júzege asyrýǵa senim artqany, sondaı-aq saltanatty rásimge qatysqany úshin Qasym-Jomart Toqaevqa alǵys aıtty.
Ven Gan Qazaqstan Prezıdentine SNMC qurylys jumystaryn joǵary deńgeıde júrgizetinin jáne ozyq tehnologııalardy qoldana otyryp, bekitilgen merzimde aıaqtaıtynyn, sondaı-aq ónerkásip pen ekologııalyq qaýipsizdik talaptaryn qatań saqtaıtynyn jetkizdi.
Onyń aıtýynsha, jobany iske asyrý jańa jumys oryndaryn ashýǵa múmkindik beredi, jergilikti maman daıarlaý jáne tájirıbe almasý salalarynda yntymaqtastyqty keńeıtedi.
Kezdesý sońynda atalǵan zaýyt Qazaqstan men Qytaı arasyndaǵy ónerkásiptik kooperatsııanyń taǵy bir tabysty úlgisine aınalyp, metallýrgııa men tereń óńdeý baǵytyndaǵy birlesken jumysqa jol ashatyny atap ótildi.
Eske salaıyq, buǵan deıin Memleket basshysy telekópir rejıminde Aqtoǵaı mys balqytý zaýytynyń qurylysyn bastaý rásimine qatysqanyn habarlaǵanbyz.
