Toqaev kenııalyq ınvestorlardy Qazaqstanmen seriktestikke shaqyrdy
ASTANA. KAZINFORM — Qasym-Jomart Toqaev pen Ýılıam Rýto «Qazaqstan-Kenııa» bıznes forýmyna qatysty. Shara barysynda Prezıdent Qazaqstan ınvestorlardyń quqyqtary men múddelerin qorǵaıtyn tartymdy ınstıtýtsıonaldyq baza qalyptastyrǵanyn aıtty.
Prezıdenttiń aıtýynsha, Qazaqstan Ortalyq Azııadaǵy ekonomıkasy iri elderdiń biri. Qazir ósim dınamıkasy — 6,5 paıyz.
— Shaǵyn jáne orta bıznes — ekonomıkamyzdyń 40 paıyzyna jýyǵyn quraıdy. El jetistikteriniń máni osynda. Memlekettegi turaqty saıası ahýal ekonomıkanyń ornyqty damýyn qamtamasyz etip otyr. Jalpyhalyqtyq referendýmda qabyldanǵan jańa Konstıtýtsııa ınvestorlar quqyǵyn qorǵaýdyń kepiline aınaldy. Qazaqstan ınvestorlardyń quqyqtary men múddelerin qorǵaıtyn tartymdy ınstıtýtsıonaldyq baza qalyptastyrdy. Instıtýtsıonaldyq qaýipsizdik arqyly uzaqmerzimdi yntalandyrý sharalaryn usynamyz. Endi sheteldik kásipkerler ınvestorlarǵa salyqtyq jáne mıgratsııalyq jeńildikter beretin «Altyn Visa» biregeı baǵdarlamasyn tolyq paıdalana alady. Osy oraıda kenııalyq bıznestiń kóshbasshylaryn atalǵan múmkindikterdi qoldanyp, Qazaqstandy ınvestıtsııa, ósim jáne uzaqmerzimdi seriktestik úshin strategııalyq baǵyt retinde qarastyrýǵa shaqyramyn, — dedi Qasym-Jomart Toqaev.
Memleket basshysy ekijaqty yntymaqtastyqty tereńdetýdiń birqatar perspektıvti salalaryna toqtaldy.
— Qazaqstan Eýrazııanyń negizgi kólik haby retinde qalyptasty. Búginde Qytaı men Eýropa arasyndaǵy qurlyq arqyly tasymaldanatyn júktiń shamamen 85 paıyzy elimizdiń aýmaǵynan ótedi. Orta dáliz ataýymen belgili Transkaspıı halyqaralyq kólik baǵdaryn belsendi túrde ilgeriletip kelemiz. Al Kenııa — 300 mıllıon halqy bar Shyǵys Afrıka naryǵyna kedergisiz kirýge múmkindik beretin basty logıstıkalyq qaqpa. Orta dálizdi Afrıkanyń mańyzdy teńiz joldarymen jalǵaý qajet. Osy maqsatta «Bir beldeý, bir jol» bastamasynyń áleýetin tolyq paıdalanǵan jón. Qazaqstan Shyǵys Afrıkanyń iri kólik-logıstıka jelisi sanalatyn Kenııadaǵy Mombasa jáne Lamý porttarymen baılanys ornatýǵa ázir. Bul aılaqtar qazaqstandyq metall ónimderi, qurylys materıaldary, sondaı-aq aýyl sharýashylyǵy men taǵam ónimderiniń eksportyn aıtarlyqtaı arttyrýǵa jol ashady. Teńiz jolyna qosa áýe qatynasyn damytý júk jetkizýdi barynsha jedeldetedi. Qazaqstandaǵy «ashyq aspan» rejımi álemdik avıatasymaldaýshylar úshin jaqsy yntalandyrý bolmaq. Eń áýeli, eki el arasynda áýe júk tasymalyn iske qosý múmkindikterin zerdeleýdi usynamyn. Árıne, bizdiń uzaqmerzimdi mindetterimizdiń biri — Astana men Naırobı arasynda tikeleı áýe reısterin uıymdastyrý, — dedi Prezıdent.
Budan buryn ekijaqty kelissózderdiń qorytyndysy boıynsha Prezıdent Qasym-Jomart Toqaev pen Kenııa Prezıdenti Ýılıam Rýto Birlesken málimdeme qabyldaǵanyn jazǵanbyz.
