Toqaev: Kenııa — Qazaqstannyń Afrıka qurlyǵyndaǵy asa mańyzdy ári senimdi seriktesi
ASTANA. KAZINFORM — Qazaqstan men Kenııa Ortalyq Azııa men Afrıkany jalǵaıtyn berik kópir qura alady. Bul týraly elimizge memlekettik saparmen kelgen Kenııa Respýblıkasynyń Prezıdenti Ýılıam Rýtomen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty.
— Kenııa — Qazaqstannyń Afrıka qurlyǵyndaǵy asa mańyzdy ári senimdi seriktesi. 1993 jyly elderimiz arasynda dıplomatııalyq qatynas ornaǵan sátten bastap, ózara qurmet pen ortaq múddelerge negizdelgen berik áriptestik qalyptastyrdyq. Sizdiń memlekettik saparyńyz ekijaqty qatynastardy damytýdaǵy tarıhı kezeńdi bildiredi. Halyqtarymyz arasyndaǵy dostyq baılanystardy nyǵaıtýǵa degen Sizdiń jeke ustanymyńyzdy joǵary baǵalaımyn. Nıý-Iorktegi alǵashqy kezdesýimiz búgingi tarıhı kúnge bastaý bolǵan der kezinde jasalǵan mańyzdy qadam boldy. Myqty kóshbasshylyqtyń arqasynda Afrıka talanttar, sheksiz ınnovatsııalar men biregeı múmkindikter qurlyǵyna aınalyp keledi. Bizdi úlken qashyqtyq bólip turǵanymen, rýhanı jaqyndyq, jańǵyrýǵa degen umtylys jáne bolashaqqa degen senim biriktiredi. Qazaqstan Eýrazııanyń dál júreginde ornalassa, Kenııa — Shyǵys Afrıkanyń kóshbasshy elderiniń biri, — dedi Qazaqstan Prezıdenti.
Memleket basshysynyń paıymynsha, bul jaıt eki eldiń áriptestigine ekijaqty qatynastar aıasynan da áldeqaıda keń mańyz beredi. Qazaqstan men Kenııa birigip, Ortalyq Azııa men Afrıkany jalǵaıtyn berik kópir quryp, naryqtardy, kólik baǵyttaryn, ınvestıtsııalyq aǵyndardy jáne jańa múmkindikterdi baılanystyra alady.
— Qazir ǵana ekijaqty yntymaqtastyqtyń negizgi perspektıvalaryn talqylap, halyqaralyq arenadaǵy ózara is-qımyl máseleleri boıynsha pikir almastyq. Sizge alǵys aıtamyn. Áńgimemiz óte mazmundy boldy. Eger ýaǵdalasqanymyzdaı, yntymaqtastyǵymyzdy damytýǵa qýatty serpin berý úshin birlesken kúsh-jiger men naqty qadamdy jalǵastyra bersek, memleketterimiz arasyndaǵy dostyqty nyǵaıtýǵa qatysty barlyq baǵytta tabysqa jetetinimizge senimdimin. Elderimiz beıbitsúıgish ári belsendi syrtqy saıasat ustanyp, kópjaqty álemdik tártipti qoldaıdy. Qazaqstan ortaq kózqarasymyzdy naqty ári ózara tıimdi jobalarǵa aınaldyrýǵa daıyn. Sizdiń saparyńyz barysynda qol jetkizilgen ýaǵdalastyqtar Qazaqstan men Kenııa arasyndaǵy qatynastardy jańa deńgeıge kóteretinine senimdimin, — dedi Qasym-Jomart Toqaev.
Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.
